वाकुका किसानलाई मकै बाली जोगाउनै मुस्किल

असार ११, सोलुखुम्बु । पूर्वी जिल्ला सोलुखुम्बुको माम्यदुधकोशी गाउँपालिका वडा नम्बर ६ वाकुमा किसानलाई मकै बाली जोगाउन मुस्किल परेको छ । बाँदरले बाली पाक्नु अगाडि नै खाएर नष्ट गर्ने समस्याका कारण किसानलाई बाली जोगाउन मुस्किल भएको हो । माम्यदुधकोशी गाउँपालिका वडा नम्बर ६ वाकुका स्थानीय देवि प्रसाद घिमिरेले किसानलाई मकै बाली जोगाउन हम्मे भएको जानकारी दिनुभयो ।

उहाँले राति दुम्सीले मकै नष्ट गर्ने र दिउँसो बाँदरले नष्ट गर्ने समस्याका कारण किसान वर्षेनी जाग्राम बस्नुपर्ने बाध्यतामा रहेको बताउनुभयो । उहाँले सरकारका नीति नियमका कारण आफूहरू समस्यामा परेको बताउनुभयो । उहाँले राज्यले जङ्गली जनावर मार्नु हुँदैन, भन्ने नीति लिएको भए पनि आफूहरूलाई पनि आवश्यक पर्ने घेरवारको व्यवस्था गर्नुपर्ने बताउनुभयो ।

वडाको सेलुवापाक्सु, पाक्दु, सेलुवा, ठुला खेत, केर्ला, वाप्सा भेग, राम्देल, तल्लो भेगमा बढी समस्या, घौयाबारी लगायतका क्षेत्रमा करिब १५ दखि २० रोपनी जग्गामा बाँदरले मकै सखाप पारेको किसानहरुले बताएका छन् । यता माप्यदुधकोशी गाउँपालिकाले गत वर्ष बाँदर धपाउनका लागि समाधन वितरण गरेको जनाएको छ ।