खोटाङको केपिलासगढी गाउँपालिकाको बजेट ४९ करोड 

असार ११, सोलुखुम्बु ।  खोटाङको केपिलासगढी गाउँपालिकाले ४९ करोड बढीको बजेट ल्याएकाे छ ।  गाउँपालिकाको १५ औँ गाउँ सभा मार्फत आर्थिक वर्ष २०८१÷८२ का लागी ४९ करोड २७ लाख ३६ हजार रुपैयाँको बजेट प्रस्तुत गरेको हो ।

गत असार ७ गते सम्पन्न गाउँपालिकाको अधिवेशनमा उपाध्यक्ष गुरुराज राईले सो रकम बराबरको बजेट पेश गर्नुभएको हो । गाउँपालिका अध्यक्ष समिर राइको अध्यक्षतामा सम्पन्न गाउँसभाले आगामी आर्थिक वर्षमा हुने आय तथा व्ययको अनुमान गर्दै आगामी आर्थिक वर्षमा गाउँपालिकालाई संघिय सरकारको वित्तिय समानीकरण अनुदानबाट ७ करोड ५६ लाख प्राप्त हुने बताइएको छ ।  यस्तै राजस्व बाँडफाँड तर्फ ८ करोड ३४ लाख ५० लाख, सशर्त अनुदान तर्फ १८ करोड ७६ लाख, समपूरक अनुदान तर्फ १ करोड २५ लाख र विशेष अनुदान तर्फ १ करोड ३५ लाख रुपैयाँ प्राप्त हुने छ ।

गाउँपालिकालाई प्रदेश सरकारबाट अनुदान स्वरुप वित्तिय समानीकरण अनुदान ४५ लाख ६२ हजार, राजश्व बाँडफाँड तर्फ ३९ लाख ७७ हजार, ससर्त अनुदान तर्फ १ करोड ६२ लाख ३९ हजार, समपूरक अनुदान तर्फ ९० लाख रुपैयाँ प्राप्त भएको छ ।  यसैबीच गाउँपालिकालाई जि फाउण्डेसन नेपालबाट १ करोड ६ लाख ८ हजार बजेट प्राप्त हुने भएको छ भने गाउँपालिकाले आन्तरिक राजस्वबाट ५० लाख रुपैयाँ उठाउने लक्ष लिएको छ ।