आत्मनिर्भर बनाउन महिलालाई झोला सिलाई तालिम

असार १२, सोलुखुम्बु । सोलुखुम्बुको सदरमुकाम सल्लेरीमा महिलाहरुलाई १ महिने झोला बनाउने तालिम दिइएको छ । महिलाहरुलाई आयआर्जनतर्फ उन्मुख गराउने उद्देश्यले तालिम दिइएको सामुदायिक वन उपभोक्ता महासंघ नेपाल जिल्ला कार्यसमिति सोलुखुम्बुका अध्यक्ष टंकी माया बस्नेतले बताउनुभयो ।

डिभिजन वन कार्यालय सोलुखुम्बुको आयोजनामा गत जेठ ११ गतेबाट सुरु भएको तालिम बुधबार सम्पन्न भएको छ । वन कार्यालयको २ लाख ५० हजार तथा सामुदायिक वन उपभोक्ता महासंघ नेपाल जिल्ला कार्यसमिति सोलुखुम्बुका अध्यक्ष टंकी माया बस्नेतको व्यक्तिगत २ लाख ५० हजार लागतमा ४३ हजार बराबरको २ वटा मेसिन खरिद गरी तालिम दिईएको थियो । समापन कार्यक्रमलाई सम्बोधन गर्दै डिभिजन वन कार्यालय सोलुखुम्बुका प्रमुख बद्रि प्रसाद शाहले महिलाहरु आर्थिक क्षेत्रमा अरुमा निर्भर हुने भएकाले हरेक महिलाहरु उद्यमशिल बन्नुपर्नेमा जोड दिनुभयो ।

महिलाहरु स्वयम उद्यमी बन्न सके परिवार तथा समाजको हेर्ने दृष्टिकोणमा समेत परिवर्तन देखिने बताउनुभयो । यस्तै सामुदायिक वन उपभोक्ता महासंघ नेपाल जिल्ला कार्यसमिति सोलुखुम्बुका अध्यक्ष टंकी माया बस्नेतले तालिममा जानेका कुरालाई निरन्तर अभ्यास गरेर व्यवसायिकतातर्फ लाग्न सके मात्र तालिमको उद्देश्य पुरा हुने बताउनुभयो ।

लिईसकेको तालिममा दक्षता हासिल गरि अगाडी बढ्न सके मात्र आफ्नो लक्ष्य प्राप्त गर्न सकिने उहाँको भनाई छ । यता आफुले लिएको तालिमलाई अबको केही समय पछि नै व्यवहारीक रुप दिने योजना रहेको तालिममा सहभागि पुजा तामाङले बताउनुभयो । लिएको तालिमलाई नया रुप दिदै स्थानीय स्तरमै व्यवसायीक रुपमा अगाडी बढ्ने उहाँको भनाई छ ।

संञ्चालित तालिम मात्र पर्याप्तता नभएको हुदाँ स्थानीय तहबाट पनि नयाँ डिजाईनबाट झोला बनाउने दिए थप हौसला मिल्ने विश्वास लिनुभएको छ । डिभिजन वन कार्यालय सोलुखुम्बु द्धारा आयोजना गरेको एक महिने हाते झोला बनाउने तालिममा ७ जना महिलाहरुको सहभागिता रहेको थियो । तालिमका झोलाको कपडा छनौट गर्ने, कटिङ गर्ने, सिलाई गर्ने र डिजाइन तयार गर्ने सम्मको सीप महिलाहरुलाई सिकाईएको थियो । साथै उक्त तालिममा उद्यपुरका कोमल कुमारी मगर र सरु मगरले तालिमले सहजिकरण गर्नुभएको थियो ।