असार १४, सोलुखुम्बु । सोलुखुम्बुको थुलुङ दधकोशी गाउँपालिकाबाट माध्यमिक शिक्षा परीक्षामा सहभागी भएका ९६ प्रतिशत बढी विद्यार्थी उत्तीर्ण भएका छन । २०८०को शैक्षिक सत्रमा गाउँपालिकाका १० वटा माविबाट राष्ट्रिय परीक्षा बोर्डले लिएको माध्यमिक शिक्षा परीक्षामा सहभागी भएका विद्यार्थीहरू २ सय ९८ मध्ये त्यसको ९७ दशमलव ३१ प्रतिशत अर्थात २ सय ९० जना विद्यार्थीले एस.इ.ई उत्तीर्ण गरेको गाउँपालिका शिक्षा शाखाले जनाएको छ ।
बाकीँ ८ जना विद्यार्थीको नतिजा भने एन. जि अर्थात नन ग्रेडेडमा आएको छ । यसैबीच यहाँबाट माध्यमिक शिक्षा परीक्षामा सहभागि भएका २ जना विद्यार्थी थुलुङ दुधकोशी गाउँपालिका प्रथम बनेका छन । जीवनज्योति मावि नेलेका विद्यार्थी उत्सव बस्नेत र जनता मावि लोखीमका गौतम राईले समान ३ दशमलव ७ जिपिए प्राप्त गर्दै पालिका प्रथम बनेका हुन ।
गाउँपालिकाले यस अघिनै निर्णय गरेर ३ दशमलव ६ भन्दा माथिल्लो जिपिए (ग्रेड पोइन्ट एभरेज) प्राप्त गर्ने विद्यार्थीलाई जनही २५ हजार र ४ भन्दा माथि जिपिए प्राप्त गर्ने विद्यार्थीलाई १ लाख रुपैयाँ नगद पुरस्कार दिने निर्णय गरे अनुरुप उनिहरुलाई पुरस्कृत गरिने गाउँपालिका प्रवक्ता भोजराज कार्कीले बताउनुभयो ।
यस पटक गाउँपालिकाले ४ जना विद्यार्थीलाई गाउँपालिकाको निर्णय बमोजिम पुरस्कृत गरिने जनाइएको छ । राई र गौतम सहित अन्य २ जना विद्यार्थीहरू ३ दशमलव ६ जिपिए प्राप्त गर्ने गान्धीमाया राई र विशाल बस्नेतलाई पनि पालिकाले पुरस्कृत गर्ने भएको छ ।
एस.इ.ई दिने विद्यार्थी बढे
गत वर्षको तुलनामा यस वर्ष थुलुङ दुधकोशी गाउँपालिकामा एसइई दिने विद्यार्थी बढेका छन । २०७९ सालको एसइईमा गाउँपालिकाका २ सय ६८ जना विद्यार्थी परीक्षामा सहभागी भएकोमा यस वर्ष २ सय ९८ जना विद्यार्थी कक्षा १०को एस.इ.ई मा समावेश भएका हुन् ।
परिणाम स्वरुप पालिका भरीको नतिजालाई हेर्दा गत वर्षको तुलनामा धेरै सुधार आएको गाउँपालिका अध्यक्ष असिम राईले बताउँनुभयो । २०७४ सालमा आफू निर्वाचित हुँदा देखिनै शिक्षा क्षेत्रमा देखिएको अतिथिको अन्त्य गर्ने गरि काम गरेको स्मरण गर्दै पालिका अध्यक्ष राईले अब त्यसको प्रतिफल देखिन थालेको बताउँनुभयो ।
पछिल्लो समय निजी विद्यालय तर्फ आम नागरिकको आकर्षण बढेको बेला यस वर्षको नतिजाले सामुदायिक विद्यालयको गरिमा बढाउनुका साथै स्थानीय सरकारको लगानीले सार्थकता पाएको उहाँको भनाई छ ।
Discussion about this post