सल्लेरीमा माथिबाट खसेको पहिरोले एक घरमा क्षति, बसोबासका लागी जोखिमपूर्ण 

असार १५, सोलुखुम्बु  । खोलुखुम्बुको सोलुदुधकुण्ड नगरपालिकाको एक घर पहिरोबाट क्षति पुगेको छ ।  शनिवार बिहान ४ बजे घर माथि रहेको कान्ला झर्दा स्थानीय हिरामाया कार्कीको टिनले छाएको घर बस्न नमिल्ने अवस्थामा पुगेको हो ।

कार्की सुतिरहेको बेला माथिबाट पहिरो खसेको थियो । यद्यपि पहिरोबाट अन्य मानवीय वा पशुचौपाया क्षति भने नभएको प्रहरीले बताएको छ ।  पहिरोले कार्कीको घर बस्न नमिल्ने अवस्थामा रहेकाले उनलाई छिमेकीको घरमा अस्थायी रुपमा बस्नका लागी अनुरोध गरिएको जिल्ला प्रहरी कार्यालय सोलुखुम्बुले जनाएको छ ।

कार्कीको घरमा पहिरोले क्षति पुगेको भन्ने जानकारी आएपछि प्रहरी तत्काल पुगेर उक्त घटनाको जानकारी लिदैँ आवश्यक उद्धारको काम गरेर फर्किएको जिल्ला प्रहरी कार्यालय सोलुखुम्बुका प्रहरी प्रमुख द्वारिका प्रसाद घिमिरेले बताउनुभयो । लगत्तै रेडियो एभरेष्टको टिम गएर स्थलगत रिपोर्टिङ गर्दा कार्कीको घरको भित्ता चर्किएको अवस्थामा पाइएको छ ।