सोलुखुम्बुमा एकै दिन बाढी पहिरोका कारण ५ घर, एउटा विद्यालय भवन जोखिममा 

असार १६ सोलुखुम्बु ।  हिमाली जिल्ला सोलुखुम्बुमा एकै दिन बाढी पहिरोका कारण ५ वटा घर जोखिममा परेका छन ।  जिल्ला प्रहरी कार्यालय सोलुखुम्बुका अनुसार आइतबार जिल्लाका विभिन्न स्थानमा भएका पहिरोका घटनाका कारण ५ वटा घर जोखीमपुर्ण अवस्थामा पुगेका हुन ।

पहिरोका कारण जिल्लाको थुलुङ दुधकोशी गाउँपालिका वडा नम्बर ३ पञ्चनका जनक बहादुर सार्कीको घर पहिरोको जोखिममा रहेको प्रहरीले जनाएको छ । प्रहरीका अनुसार आइतबार विहान सार्कीको घरमाथि बाट करीव २ सय मिटरको पहिरो खस्दा उनको गोठमा बाँधेको एक वटा गाई मरेको छ भने एक वटा भैँसी पहिरोका कारण सामान्य घाइते भएको छ ।  सोही पहिरोबाट  सार्कीको घर जोखिममा परेको हो । यस्तै सोही वडाको पहिरोथामका वल बहादुर बानियाँको घर पनि पहिरोको जोखिममा परेको प्रहरीले जनाएको छ ।  

जिल्ला प्रहरी कार्यालयका अनुसार बानियाँको २ तले टिनको छानो भएको घर माथिबाट पहिरो खस्दा जोखिममा परेको हो  । यता थुलुङ दुधकोशी गाउँपालिका वाकु स्थित तुङ्से बाट काँगेल जाने बाटोमा आएको बाढीका कारण सोही स्थानमा रहेको स्थानीय पुर्ण कुमारी थापाको घर र लोथ कुमार थापाको घर बाढीको जोखिममा रहेको प्रहरीले जनाएको छ ।

 जोखिममा रहेका २ घरलाई सुरक्षित बनाउन जेसिबिले भल कटाउने काम गरिरहेको प्रहरीले जनाएको छ । त्यस्तै थुलुङ दुधकोशी गाउँपालिकाको वडा नम्बर २ वाचिनका राम बहादुर थापाको मुनिबाट पहिरो जादा उक्त घर समेत पहिरोको जोखिममा परेको जनाइएको छ । पहिरोको जोखिममा रहेको उक्त घर अहिले बस्नै नमिल्ने अवस्थामा रहेकोले सो घरमा बस्ने मानिसहरूलाई अन्यत्र सारिएको छ । पहिरोकै कारण थुलुङ दधकोशी कै एक विद्यालय भवन जोखिममा रहेको छ ।

गाउँपालिकाको वडा नम्बर ३ स्थित कालिका देवी माविको खेल मैदानमा लगाइएको ६० मिटर लामो वाल पहिरोको कारण चर्किदा उक्त विद्यालयको २ कोठे भवन पहिरोको जोखिममा रहेको प्रहरीले जनाएको हो । यता पहिरोका कारण जिल्लाको लिखुपिके गाउँपालिकाको वडा नम्बर ४ डुडा स्थित किन्जा बाट चौलाखर्क जाने बाटो अवरुद्ध भएको जनाइएको छ ।

जिल्लामा मनसुन जन्य विपदका घटना बढिरहेका छन । यद्यपि यस्तो विपदबाट हाल सम्म जिल्लामा मानवीय क्षति भने नभएको प्रहरीले जनाएको छ ।