विकास र परिवर्तन आफैबाट खोज्नु पर्ने अध्यक्ष राईको भनाई

असार १७, सोलुखुम्बु । खोटाङको साकेला गाउँपालिकाका अध्यक्ष रवि प्रकाश राईले परिवर्तन आफैबाट सुरु गरेर मात्र सम्भव हुने बताउनुभएको छ । साकेला गाउँपालिका स्थित वडा नम्बर १ बाँझेच्यानडाँडाको आयोजनामा आईतबार १ नम्बर वडा कार्यालयमा आयोजित उत्कृष्ट विद्यार्थीलाई सम्मान तथा छात्रवृत्ति रकम वितरण कार्यक्रममा बोल्नुहुँदै अध्यक्ष राईले सो कुरा बताउनुभएको हो ।

उहाँले सरकारले गर्न चाहेर मात्र देशको विकास नहुने बताउनुहुँदै विकास र समृद्धिका लागि नागरिकस्तरमा चेतनाको विकास हुन जरुरी भएको धारणा व्यक्त गर्नुभयो । यसैबीच, अध्यक्ष राईले शैक्षिक गुणस्तर वृद्धि गर्न सरकार पक्ष एक्लै लागेर सम्भव नहुने बताउनुहुँदै विद्यालय व्यवस्थापन समिति, शिक्षक, अभिभावक र विद्यार्थी एकमुठ्ठी भएर लागे मात्र गुणस्तरमा सुधार आउने धारणा व्यक्त गर्नुभयो ।

साकेला गाउँपालिकास्थित वडा नम्बर १ ले चालु आर्थिक वर्ष २०८०÷०८१ मा वडागत शिलिङबाट विनियोजन गरेको रकमबाट शैक्षिक सत्र २०८० मा वडामा रहेका माध्यमिक तथा आधारभूत विद्यालयमा अध्ययनरत उत्कृष्ट विद्यार्थी छनौट गरेर छात्रवृत्ति रकम प्रदान गरेको हो । राधाकृष्ण माविमा कक्षा ३ मा अध्ययनरत छात्र हिमाल राई, चण्डेश्वरी मावि कक्षा ८ मा अध्ययनरत मार्टिना राई, सरस्वती प्रावि कक्षा ४ मा अध्ययनरत पारुहाङ राई, बालबालिका प्रावि कक्षा ४ मा अध्ययनरत रोजिना खड्का, जनता आविमा अध्ययनरत गोमा भुजेल र जालपा आवि कक्षा ८ मा अध्ययनरत भीमकुमारी गुरुङलाई छात्रवृति रकम उपलब्ध गराईएको हो ।

उत्कृष्ट अंक ल्याउने ६ जना विद्यार्थीहरुलाई जनही पाँच–पाँच हजार रुपैंया छात्रवृत्ति प्रदान गरिएको वडा सचिव नमी राईले जानकारी दिनुभयो