साेलुखुम्बु : सोमबार बाढी पहिरोका ३ घटना, एक मन्दिर पूर्ण रुपमा क्षती 

असार १७, सोलुखुम्बु ।  सोमबार सोलुखुम्बुमा बाढी पहिरोका ३ वटा घटना भएका छन । जिल्ला प्रहरी कार्यालय सोलुखुम्बुका  अनुसार सोमबार आज जिल्लाका विभिन्न स्थानमा बाढी पहिरोका ३ वटा घटना सम्बन्धी घटनामा प्रहरीले समन्वय र उद्धार गरेको जनाएको हो । जिल्लामा आज सोलुदुधकुण्ड नगरपालिका, थुलुङ दुधकोशी गाउँपालिका र लिखुपिके गाउँपालिकामा पहिरो सम्बन्धी घटनाहरू भएको जनाइएको छ । प्रहरीका अनुसार सोलुदुधकुण्ड नगरपालिका वडा नम्बर ८ स्थित एक विद्यालयको शौचालय पहिरोको जोखिममा परेको छ ।

वडा नम्बर ८ मा रहेको शिंहकाली आधारभुत विद्यालयको खेल मैदान छेउमा लगाइएको पर्खाल चर्किदा नजिकै रहेको उक्त विद्यालयको शौचालय भत्किने जोखिममा परेको छ । यस्तै आजै जिल्लाकै थुलुङ दूधकोशी गाउँपालिका ५ स्थित त्रैलोकेश्वर मन्दिर माथिबाट पहिरो खस्दा मन्दिर पूर्ण रूपमा क्षतिग्रस्त बनेको प्रहरीले जनाएको छ । यता जिल्लकै लिखुपिके गाउँपालिकामा एक घर पहिरोको उच्च जोखिममा परेको छ । प्रहरीका अनुसार गाउँपालिका २ कमलडाडा बस्ने यज्ञ बहादुर बस्नेतको घर मुनिबाट पहिरो जाँदा उक्त घर पहिरोको जोखिममा परेको छ ।  

प्रहरीका अनुसार बस्नेतको ३ तले ढुङ्गामाटोले बनेको ३ तले घर पहिरोको जोखिममा रहेको छ । यस अघि आइतबार मात्रै जिल्लामा बाढी पहिरोका कारण ५ घर पहिरोको जोखिममा परेका थिए । हिजो बाढी पहिरोका ६ वटा घटना घटेको प्रहरीले जनाएको छ । बाढी पूर्वानुमान महाशाखाका अनुसार अझै केही दिन नेपालका पूर्वी क्षेत्रहरूमा बाढी पहिरोको जोखिम रहने भएकाले सतर्कता अपनाउन भनिएको छ ।