देशभर भिषण वर्षा, माथिल्लो सगरमाथाका ३ जिल्लामा उच्च सतर्कता अपनाउन आग्रह

असार १८, सोलुखुम्बु । देशभर विभिन्न स्थानमा वर्षा हुने क्रम जारी छ। अहिले (मंगलबार बिहान) पनि कोसी, मधेस, बागमती र गण्डकी प्रदेशका केही स्थान, लुम्बिनी प्रदेशका थोरै स्थान तथा बाँकी प्रदेशका एक÷दुई स्थानमा मेघगर्जन÷चट्याङसहित हल्कादेखि मध्यमसम्म वर्षा भइरहेको मौसम पूर्वानुमान महाशाखाले जनाएको छ।

महाशाखाका अनुसार दिउँसो पनि देशैभरका धेरै स्थानमा मेघगर्जन÷चट्याङसहित हल्कादेखि मध्यमसम्म वर्षा हुने सम्भावना छ। साथै बागमती, गण्डकी, लुम्बिनी, कर्णाली र सुदूरपश्चिम प्रदेशका थोरै स्थान तथा कोसी र मधेस प्रदेशका एक÷दुई स्थानमा भारी वर्षाको पनि सम्भावना छ ।

बागमती, गण्डकी र लुम्बिनी प्रदेशका एक÷दुई स्थानमा धेरै भारी वर्षाको पनि सम्भावना छ । यस्तै जल तथा मौसम विज्ञान विभाग ओखलढुङ्गाका अनुसार माथिल्लो सगरमाथाका ३ जिल्ला खोटाङ, ओखलढुंगा र सोलुखुम्बुमा बाढी पहिरोको जोखीम रहेको छ । कार्यालयका अनुसार सोलुखुम्बुको उच्च हिमाली क्षेत्र लुक्लामा पछिल्लो १२ घण्टामा १७ दशमलव ०३२ मिलिमिटर बर्षात भएको छ ।

यस्तै खोटाङको खोटाङ बजारमा १ दशमलव ८ मिलिमिटर, ओखलढुङ्गाको मानेभञ्ज्याङमा पछिल्लो २४ घण्टामा १४ दशमलव ४ मिलिमिटर, सोलुखुम्बुको पेकरनासमा ३४ दशमलव ४ मिलिमिटरपानी परेको छ ।