थुलुङ दुधकोशीः कफी प्रशोधनको तयारी अन्तिम चरणमा 

असार १८, सोलुखुम्बु ।  जिल्लाको थुलुङ दुधकोशी गाउँपालिकामा कफी प्रशोधनको तयारी अन्तिम चरणमा पुगेको छ । कफी प्रशोधनका लागि आवश्यक भौतिक संरचना तयारी अवस्थामा रहेको छ भने अन्य उपकरण समेत खरिद कार्य सकिएको पालिका प्रवक्ता भोजराज कार्कीले जानकारी दिनुभयो । 

प्राप्त जानकारी अनुसार कृषि वन श्रोत केन्द्रले खरिदको जिम्मा पाएको छ । उक्त केन्द्रले समेत खरिद खरिद ऐनलाई टेकेर समितिनै गठन गरि उपकरण खरिद गरेको जनाएको छ ।थुलुङ दुधकोशी गाउँपालिका र द ग्लासीयर ट्रष्ट बेलायतको आर्थिक साझेदारीमा सुरु हुन लागेको कफी प्रशोधन केन्द्रको उपकरण खरिदका लागी ७० लाख रुपैयाँ लागत रहने बताइएको छ । 

भौतिक विकास सँगै आर्थिक विकासलाई समेत प्राथमिकता दिएको गाउँपालिकाले स्थानीय स्तरमा उत्पादन भएको कफीलाई विश्व बजारमा बिक्री गर्ने नीति लिएको गाउँपालिका अध्यक्ष असिम राईले जानकारी दिनुभयो । गाउँपालिकाले कफी निर्यातलाई प्रतिवन्धनै लगाएर नेपालको भन्दा बढी मूल्य दिएर किसानको कफी खरिद गरिदिएको उहाँको भनाई छ । 

उत्पादनको आधारमा अनुदान दिने पालिकाको नीति अनुसार काम भइरहेको भन्दै अध्यक्ष राईले कृषकको अन्य उत्पादनलाई समेत बजारमा पुर्याउन सहयोग गरिरहेको बताउँनुभयो । इको हिमाल नेपालको समन्वय,  थुलुङ दुधकोशी गाउँपालिका र ग्लासियर ट्रष्टको लागत साझेदारीमा सञ्चालनमा आउन लागेको कफी प्रशोधन केन्द्र मुक्ली रहने छ ।