नेचासल्यानले विपद व्यवस्थापनका लागि पालिकाको रकम खर्च गर्ने

असार १९, सोलुखुम्बु । पूर्वी जिल्ला सोलुखुम्बुको नेचासल्यान गाउँपालिकाले विपद व्यवस्थापनका लागि पालिकाको रकम खर्च गर्ने निर्णय गरेको छ । बुधबार गाउँपालिका अध्यक्ष धनजन राईको अध्यक्षतामा बसेको विपद व्यवस्थापन समितिको बैठकमा यस्तो निर्णय गरेको हो । असार १० गतेबाट अविरल बर्षाका कारण नेचासल्यान गाउँपालिकाका विभिन्न सडक तथा जिल्ला सदरमुकाम लगायत अन्य जिल्ला जोड्ने सडक बाढी, पहिरोको जोखिममा रहेकाले सतर्कता अपनाउन समेत गाउँपालिकाले आग्रह गरेको छ ।

यस्तै आज बसेको बैठकमा इलाका प्रहरी कार्यालय, प्रहरी चौकी, वडा कार्यालय, रेडक्रस, विद्यालय, कार्यालयहरुमा समेत विपद व्यवस्थापनका सामाग्री तयारी अबस्थामा राख्ने निर्णय गरिएको सहकर्मी धनकुमार ढुगेंलले जानकारी दिनुभयो । जिल्लामा विपत क्षेत्रमा कार्य गर्दे आइरहेको रेडक्रस कार्यालयमा हाल सम्म विपद व्यवस्थापनको साम्रागी नभएकाले आवश्यक सामाग्री व्यवस्थापनका लागि सम्बन्धित निकायमा पहल गर्ने निर्णय गरिएको गाउँपालिका अध्यक्ष धनजन राईले बताउनुभयो । उक्त बैठकमा विभिन्न वडाका वडा अध्यक्ष, कार्यापालिका सदस्य लगायत सरोकारवालाहरुको समेत उपस्थित रहेको थियो ।