खिजिदेम्बाका ४ माविका विद्यार्थीलाई पोषणयुक्त खाजा खुवाईने

कोसी प्रदेशमै पहिलो पटक ओखल्ढुंगाको खिजिदेम्बा गाउँपालिकाका विद्यालयमा पोषणयुक्त खाजा कार्यक्रम लागु हुने भएको छ । पालिका अध्यक्ष गम्बु शेर्पाको पहलमा लण्डन दातृ निकाय भएको गैह्रसरकारी संस्था कल्स ओवर रिजेज नेपालले आर्थिक तथा प्राविधिक सहयोग गर्ने गरि सम्झौता भएसँगै पालिकाका ४ वटा माविमा कार्यक्रम लागु गरिएको हो । पालिकामा विहीबार आयोजित कार्यक्रममा कल्स ओवर रिजेज नेपाल, गाउँपालिका र सम्बन्धित विद्यालय गरि त्रिपक्षिय सम्झौतामा हस्ताक्षर गरिएको हो ।

विद्यालयमा नियमति विद्यार्थी टिकाउने, पोषणयुक्त खाजा उपलब्ध गराई स्थानीय उत्पादन र रोजगारीलाई समेत बढावा दिने लक्ष्य राखेर गरिएको सम्झौता यो बर्ष ४ वटा माध्यामिक विद्यालयमा लागु हुने छ । वडा नम्बर १ को नर्वदेश्वर मावि, वडा नम्बर २ को चण्डेश्वरी मावि, वडा नम्बर ५ को फुलमित मावि र वडा नम्बर ४ को कुण्डली माविका ईसिडि देखि कक्षा १२ सम्मका विद्यार्थीलाई पोषिलो खाजा खुवाईने छ । जस्का लागि गैह्रसरकारी संस्था कल्स ओवर रिजेजले प्रति विद्यार्थी रु. २०, गाउँपालिकाले प्रति विद्यार्थी रु. ५ र अभिभावकले प्रति विद्यार्थी ५ रुपैंया लागत ब्यहोर्नु पर्नेछ । विद्यालय खुल्ने ६ दिन नै फरक फरक मेनु बनाई गाउँमै उत्पादिन अर्गानिक खाजा विद्यार्थीले खान पाउने छन् । यो कार्यक्रम लागु भए पछि पत्रु खाना(जंक फुड) भने पूर्ण रुपमा प्रतिबन्ध लगाईने पालिका अध्यक्ष गम्बु शेर्पाले बताउनु भयो ।
अघिल्लो बर्ष वडा नम्बर १ को माविमा लागु गरिएको परियोजना सफल भएपछि यो पटक अन्य विद्यालयमा विस्तार गरिएको हो । आगामि बर्ष बाँकी ३ वटा माध्यामिक विद्यालयमा पनि यो परियोजना लागु हुने छ । यो बर्षको विद्यार्थी दिवा खाजा कार्यक्रमकै लागि पालिकाले १५ लाख ३० हजार रकम विनियोजन गरेको अध्यक्ष शेर्पाले बताउनु भयो । यो कार्यक्रम लागु भए पछि सामुदायीक विद्यालयमा विद्यार्थीको आकर्षण बढ्नुका साथै शिक्षाको गुणस्तर समेत बढ्ने अध्यक्ष शेर्पाको विश्वास छ । साथै स्थानीय कृषि उपजले पनि गाउँमै मुल्य पाउने भएपछि कृषिको ब्यवशायीक विकासमा टेवा पुग्ने अपेक्षा पालिकाको छ । सम्झौतामा संस्थाको तर्फबाट अध्यक्ष साङडोमा शेर्पा, पालिका अध्यक्ष गम्बु शेर्पा र सम्बन्धित सहायता प्राप्त गर्ने विद्यालयका प्रधानाध्यापकहरुको हस्ताक्षर रहेको छ । कार्यक्रममा पालिका उपाध्यक्ष शुसिला तामाङ, वडा अध्यक्ष होमबहादुर सुनुवार लगायतको उपस्थिति रहेको थियो ।