बोलेरो दुर्घटनामा परेका दुई जना किर्तिपुर अस्पतालमा उपचारत

असार २१, सोलुखुम्बु । सोलुखुम्बुबाट काठमाडौंका लागी छुटेको बोलेरो दुर्घटनामा परेका दुई घाईतेको काठमाडौँ स्थित किर्तिपुर अस्पतालमा उपचार भइरहेको छ । ओखलढुंगाको सिद्धिचरण राजमार्ग अन्तर्गत सिद्धिचरण नगरपालिका–८ जरङ्गेको भुसुने जङ्गलमा सोलुखुम्बुबाट काठमाडौँ जाँदै गरेको स १ ज ५५६ नम्बरको डबल क्याप बोलेरोको एक्सल भाँच्चिएर अनियन्त्रित हुदाँ दुई जना घाइते भएको जिल्ला प्रहरी कार्यालय ओखलढुगांले जनाएको छ ।

घाइते हुनेमा सोलुखुम्बुको सोताङ गाउँपालिका ५ बस्ने वर्ष ३८ की रन्जु खड्काको बायाँ हातमा चोट लागेको छ । यस्तै सोही बोलेरोमा सवार रामेछापको गोकुल गंगा गाउँपालिका ५ बस्ने वर्ष ३१ को दिनेश थापाको बायाँ कुम र ढाडमा सामान्य चोट लागेको जिल्ला प्रहरी कार्यालय अखलढुगांका प्रहरी निरिक्षक तथा सुचना अधिकारी विजय कार्कीले जानकारी दिनुभयो । उहाँका अनुसार मिसन अस्पतालबाट थप उपचारका लागि काठमाडौं पठाइएकोे जनाइएको छ ।

बोलेरो चालक बागलुङको ढोरपाटन नगरपालिका–७ स्थायी घर भएका २५ वर्षीय सहबहादुर विकलाई नियन्त्रणमा लिएर अनुसन्धान भइरहेको छ । बोलेरोमा सवार चालक र अन्य चार जनाको अवस्था सामान्य रहेको प्रहरीले जनाएको छ ।