सोलुखुम्बुको धान रोपाइँ ४८ प्रतिशत, कोशी  प्रदेशमा ३४ प्रतिशत सकियो 

असार २१, सोलुखुम्बु । सोलुखुम्बु कोशी प्रदेशका उच्च पहाडी ३ जिल्ला मध्ये सोलुखुम्बुमा यो वर्षको हाल सम्म सबै भन्दा बढी  धान रोपाइँ सम्पन्न भएको छ । प्रदेशका उच्च पहाडी जिल्लाहरु ताप्लेजुङ, सङ्खुवासभा र सोलुखुम्बु मध्ये हाल सम्म सबै भन्दा धेरै धान रोपाइँ सोलुखुम्बुमा भएको हो  । यस्तै प्रदेशका १४ वटा जिल्ला मध्ये हाल सम्मको दोश्रो बढी  ४८ प्रतिशत धान रोपाइँ सम्पन्न भएको छ । कृषि विकास निर्देशनालय कोशी प्रदेशका अनुसार २०८१ सालको धान रोपाइँ जिल्लामा ४८ दशमलव ०८ प्रतिशत सकिएको हो । हाल सम्म रोपाइँ भएका जिल्लामा सबैभन्दा धेरै भोजपुरमा ५० प्रतिशत धान रोपाइँ भएको छ ।

 सोलुखुम्बुमा रहेको कुल धान रोपाइँ हुने १ हजार २ सय २५ हेक्टर क्षेत्रफल मध्ये यस वर्षको असार २१ गते सम्म ५ सय ८८ दशमलव ८८ हेक्टर क्षेत्रफलमा धान रोपाइँसकिएको निर्देशनालयले जनाएको छ । जिल्लामा रहेको कुल ४५ हजार ३ सय ८५ हेक्टर खेतियोग्य जमिन मध्ये यस वर्ष १२ सय २५ हेक्टर क्षेत्रफलमा धान रोपाइँ हुने अनुमान गरिएको थियो ।

यस्तै कोशी प्रदेश भरि यस वर्षको धान रोपाइँ३४ प्रतिशत सकिएको छ । प्रदेशभरि कल धान रोपाइँ हुने २ लाख ७६ हजार ३ सय ४८ हेक्टर क्षेत्रफल मध्ये यस वर्षको असार २१ अर्थात आज सम्म ३४ दशमलव ४३ प्रतिशत धान रोपाइँ सकिएको हो । गत वर्षको असार २१ गते सम्म धान रोपाइँ भएको तथ्याङ्कलाई हेर्दा यस वर्षको हाल सम्म प्रदेशमा धान रोपाइँभएको २ प्रतिशत कम हो । गत वर्ष कोशी प्रदेशमा असार २१ गते सम्म ३६ दशमलव ६७ प्रतिशत धान रोपाइँ सकिएको हो । 

निर्देशनालयका अनुसार ओखलढुङ्गामा ४० प्रतिशत धान रोपाइँ सकिएको छ । यस्तै खोटाङमा ३७, उदयपुरमा २८, ताप्लेजुङमा ३८, सङ्खुवासभामा २५, पाँचथरमा ४५, इलाममा ४४, भोजपुरमा ५०, तेह्रथुममा ३५, धनकुटामा १८, झापामा २९, मोरङमा ४५ र सुनसरीमा २३ प्रतिशत धान रोपाइँ सम्पन्न भएको छ । निर्देशनायलका बाली विकास अधिकृत भवानी बस्नेतले जारी गरेको बुलेटिनका अनुसार प्रदेशका उच्च पहाडी ३ जिल्लामा हाल सम्म ३१ प्रतिशत, मध्ये पहाडी ८ जिल्लामा ३८ प्रतिशत र तराइका जिल्लाहरूमा ३१ प्रतिशतको हाराहारीमा धान रोपाइँ सकिएको हो  ।