याक तथा चौरी व्यवसाय संरक्षणमा सोलुका किसानको जोड

असार २१, सोलुखुम्बु । हिमाली जिल्ला सोलुखुम्बुमा लोपन्मुख हुन लागेका याक तथा चौरी व्यवसायलाई किसानहरुले जोड दिन थालेका छन् । जिल्लामा चौरीपालनको अत्यन्तै सम्भावना रहेकोले किसानहरुले यस पेशालाई जोड दिन थालेका हुन् । सोलुदुधकुण्ड नगरपालिका वडा नम्बर २ का छिरिङ पेम्बा शेर्पाले ४५ वटा चौरी पालन गर्दै आएको बताउनुभएको छ ।

यस व्यवसायबाट राम्रो आम्दानी हुने भएकाले केहि समय अझै चौरी थप गर्ने उहाँको भनाई छ । शुक्रबार सोलुदुधकुण्ड नगरपालिकाको आयोजनामा नगरपालिकाको ७५ र कृषकहरुको २५ प्रतिशत लागत साझेदारीमा २६ लाख ६४ हजार बरबरको सामाग्री वितरण गरिएको हो । सामाग्रीमा क्रिम सेप्रेटर मेशिन, ब्लोअर, सोलार सेट, भिटामिन, त्रिपाल, पाईप लगायतका आवश्यक सामाग्री वितरण गरिएको छ ।

आज पालिका भित्रका ४४ जना किसानहरुलाई विभिन्न सामाग्रीहरु वितरण गरिएको पशु शाखा प्राविधिक गणेश थापाले जानकारी दिनुभयो । सामाग्री वितरण कार्यक्रममा सोलुदुधकुण्ड नगरपालिकाका मेयर नाम्गेल जाङ्बु शेर्पाले जिल्लामा याक तथा चौरी व्यवसाय लोप हुन नदिनका लािग व्यवासयीहरुलाई आवश्यक सहयोग गर्ने प्रतिबद्वता समेत व्यक्त गर्नुभएको छ । यस्तै याक तथा चौरी व्यवसाय संघका अध्यक्ष थुतोप दोर्जे शेर्पाले चौरी व्यवसायमा उत्साह थप्न जरुरी रहेको बताउनुभयो ।

पछिल्लो समय युवाहरु विदेश बढि पलायन हुने भन्दै जिल्लामा नै चौरी व्यवसाय गरेर राम्रो आम्दानी लिन सकिने उहाँको भनाई छ । चौरी, याक पालनले पर्यटन व्यवसाय पनि फस्टाउन सक्ने अध्यक्ष शेर्पाले उल्लेख गर्नुभयो ।