जुरेथुम्का सामुदायिक वनमा खयर रोप्ने अभियान, पहिलो दिन आज १ हजार खाडल तयार 

२१ असार सोलुखुम्बु ।  खोटाङको दिक्तेल रूपाकोट मझुवागढी नगरपालिका १५ विजयखर्कका युवाले एकैपटकमा ७ हजार खयरका बिरुवा वृक्षरोपण गर्ने भएका छन ।  स्थानीय जुरेथुम्का सामुदायिक वन उपभोक्ता समितिको अगुवाईमा आगामी ५ दिन भित्र वनको हाता भित्र ७ हजार खयर रोप्ने गरी काम भइरहेको जनाइएको हो ।

खयरले भविष्यमा आम्दानी पनि दिने र जङ्गलभरि हराभरा हुने भएकाले जङ्गलमा खयर रोप्ने अभियान सुरु गरिएको जनाइएको छ ।  स्थानीहरूको जनश्रमदानमा अभियाननै चलाएर विरुवा रोप्ने काम आज बाट सुरु गरिएको र अभियानको पहिलो दिन आज १ हजार वटा बिरुवा रोप्ने खाडल खनिएको सामुदायिक वन उपभोक्ता समितिका अध्यक्ष राजकुमार खनालले बताउनुभयो ।

डिभिजन वन कार्यालय खोटाङको बिरुवा सहयोगमा जङ्गल हाता भित्र खयर रोपिने अध्यक्ष खानलले बताउनुभयो । वर्षायामको समयमा जङ्गलमा वृक्षारोपण गर्दा धेरै बिरुवाहरू नमर्ने र जङ्गल हरियाली हुने भएकाले वृक्षारोपण आवश्यक रहेको स्थानीय नरेन्द्र ढकालको भनाई छ ।

अहिले सामुदायिक वनको फूलमती देखी काला ढुँगा सम्म वृक्षारोपण गरिने र क्रमश सबैतिर वृक्षरोपणका काम लाई तिव्रता दिइने समितिले जनाएको छ ।