पिके बेसक्याम्पमा जारी चौँरी महोत्सवको आज दोश्रो दिन

साेलुखुम्बु – चौँरी तथा याक महोत्सवको आज दोश्रो दिन सोलुखुम्बुको लिखुपिके र सोलु दूधकुण्ड नगरपालिकाको सिमाना पर्ने पिके बेसक्याम्पमा जारी छ । सोलुखुम्बुको इतिहासमै पहिलो पटक भएको यो महोत्सव याक तथा चोरी पालक किसान संघ सोलुखुम्बुको आयोजनामा सुरु भएको हो । लोपउन्मुख चौँरी पालन पेशालाई प्रवर्द्धनका गर्ने उद्देश्य सहित मंगलबार सुरु भएको महोत्सवको  लिखुपिके गाउँपालिकाका अध्यक्ष मिना कार्की बस्नेतले उद्घाटन गर्नुभएको थियो । कृषि र पर्यटनलाई टेवा दिने चौँरी पालन पेशाको प्रवर्द्धनका गर्न गाउँपालिकाले आगामी नीति तथा कार्यक्रममा यसको सम्बोधन गर्ने उहाँले बताउनुभएको छ ।

महोत्सवको उद्घाटन गर्दै उहाँले पर्यटन र कृषि दुबै क्षेत्रमा चौँरी र याक व्यवसायको उत्तिकै महत्व रहेकाले यसको प्रवर्द्धनका गर्न स्थानीय सरकार तयार रहेको बताउनुभएको छ । यस्तै कार्यक्रम उद्घाटनका क्रममा उहाँले पिके डाँडाको पर्यटन प्रवर्द्धनका लागी पिके महोत्सवको पनि घोषणा गर्नुभएको छ । महोत्सवमा लिखुपिके गाउँपालिकाका २० जना कृषकका र सोलु दूधकुण्ड नगरपालिकाका १५ कृषकका चौँरी ल्याइएको थियो ।

महाेत्सवमा चौरीका साथै चौरीबाट उत्पादन हुने स्थानीय उत्पादन जस्तै चिज घ्यू, छुर्पी प्रदर्शनमा राखिएको थियो । नेपालमै लोपउन्मुख चौँरीपालन व्यवसाय अहिले बेवास्तामा पर्दै गएपछि सोलुखुम्बुका सम्बन्धित स्थानीय तहहरूको ध्यानाकर्षणका लागी महोत्सवको आयोजना गरिएको याक तथा चौँरी व्यवसायी संघ सोलुखुम्बुका अध्यक्ष थुटोप दोर्जी शेर्पाले बताउनुभयो ।

चौँरीपालन व्यवसाय व्यवसाय मात्र नभई पर्यटनका लागी पनि उत्तिकै महत्वपूर्ण रहेकाले यसलाई पर्यटनसँग जोड्न महोत्सवको आयोजना गरिएको अध्यक्ष शेर्पाको भनाई छ । चौंरीपालक किसानको व्यवसायिक विकासमा टेवा पुग्ने भएकाले याक तथा चौँरी पर्यटन महोत्सव कोशेढुङगा सावित भएको उहाँले बताउनुभयो । महाेत्सव भाेली विहीबार सिकदै छ ।