मनसुन जन्य विपदबाट उदयपुरमा ३ जनाको मृत्यु, लाखौँ को भौतिक क्षति 

असार २५, सोलुखुम्बु ।  उदयपुरमा मनसुन जन्य विपदबाट ३ जनाको मृत्यु भएको छ । जिल्ला प्रहरी कार्यालय उदयपुरका अनुसार जिल्लामा मनसुन जन्य विपदबाट गत २२ गते देखी २५ गते सम्म ३ जनाको मृत्यु भएको हो । गत २२ गते जिल्लाको रौतमाई गाउँपालिका वडा नम्बर ५ मा एक ५ वर्षीय बालकको ज्यान गएको थियो । आँपटारका स्थानीय नरेन्द्र राईका ५ वर्षीय छोरा राज राईलाई स्थानीय अमृत खोलाले बगाउँदा उनको मृत्यु भएको थियो ।

उनलाई खोलाले बगाउँदा १ सय मिटर तल पु¥याएको थियो । यस्तै जिल्लाकै बेलका नगरपालिका वडा नम्बर ३ सातपत्रेका १ जनालाई पनि खोलाले बगाउँदा मृत्यु भएको छ । स्थानीय ५० वर्षीय इन्द्र बुढाथोकीलाई स्थानीय गिदेरी खोलाले बगाउँदा बेपत्ता भएका थिए । उनलाई प्रहरीको निरन्तरको खोजतलास पछि सोमबार मृत अवस्थामा फेला पारेको थियो । २५ गते आज पनि पहिरोमा परेर एक जना बालिकाको ज्यान गएको छ ।  जिल्लाको त्रियुगा नगरपालिका ३ खाँदबारीकी ९ वर्षीय बालिका रुपाकला मगरको पहहिराेमा परि मृत्यु भएको हो ।  

यसैबीच जिल्लामा २ दिनको अवधीमा मनसुन जन्य विपदबाट ४ लाख ६५ हजार बढीको क्षति भएको छ  । २२ गते देखी २४ गते बृलुका सम्म जिल्लामा भएका ४ वटा बाढी पहिरोका घटनाबाट उदयपुरगढी गाउँपालिका सुकुलटारका नरबहादुर पुलामी मगरको घर चर्किदा १ लाख ५० हजार, चौदण्डीगढी गाउँपालिका ३ हात्तीसारका धुर्ब थापा मगरको घर जंगली हात्तिले भत्काउँदा १ लाख १० हजार, त्रियुगा नगरपालिका १० ढाँडखर्क बस्ने रमेश तामाङको घर अत्याधिक वर्षाका कारण भासिँदा १ लाख २५ हजार र लिम्चुङबुङ गाउँपालिका १ का अम्बर राईको घर अविरल बर्षातका कारण भत्कँदा १ लाख ३० हजार बराबरको क्षती भएको प्रहरीले जनाएको छ । बर्षातका कारण जिल्ला भित्र भएर बहने बरुवा, त्रियुगा लगायत ससाना खोला खोल्सा हरुमा जल सतह समेत बढेकाले सतर्क रहन प्रहरीले जनाएको छ ।