बाढीको उच्च जोखिममा गाईघाट बजार

असार २६, सोलुखुम्बु । असार २५ गते आएको अविरल बर्षाका कारण बरुवा नदिमा आएको बाढीले बाँध भत्काएर कटान गर्दा उदयपुरको सदरमुकाम गाईघाट बजार उच्च जोझिममा परेको छ । मंगलबार बिहानदेखि आएको अविरल वर्षाले बरुवा नदिमा बाढी आउँदा त्रियुगा नगरपालिका ११ स्थित धिम्की पिकनिक स्पोर्टमा लगाएको बाँध भत्काएर कटान शुरु गरेपछि गाईघाट बजार उच्च जोखिममा परेको हो ।

आएको बाढीले बाँध भत्काएर कटान गर्दै बजार क्षेत्र प्रवेश गर्न खोजेपछि अस्थायी बाँध निर्माण गरि नदिको कटानलाई रोक्ने प्रयास गरिएको भए पनि अहिलेसम्म सकिएको छैन । नदिले कटान गरि बजार क्षेत्र प्रवेश गरेमा गाईघाट बजार क्षेत्रका २० हजार बढी घर परिवारका एक लाख बढी मानिस प्रभावित हुने खतरा बढेको छ । उक्त क्षेत्रमा कटान गरी नदि बजार क्षेत्र प्रवेश गरे सदरमुकाम गाईघाटको त्रियुगा नगरपालिका वडा नं ११, १२ र १३ का अधिकांश घर डुवानमा पर्नुका साथै नदिले बगाउने निश्चित छ ।

सोमबार रातिदेखिको निरन्तर वर्षाका कारण त्रियुगा नगरपालिका–१५ तोरीबारीमा पहिरोमा परी एकजनाको मृत्यु भएको छ भने अन्य दुईजना घाइते भएका छन् । जिल्ला प्रहरी कार्यालय उदयपुरका अनुसार ८ वर्षीय रुपकला मगरको मृत्यु भएको तथा ४० वर्षीया हीरामाया मगर र निजका सात वर्षीय छोरा योगेश मगर घाइते भएका छन् । उनीहरूको स्थानीय अस्पतालमा उपचार भइरहेको छ ।