सोलुदुधकुण्ड नगरपालिका २ बेनीलाई कृषि यान्त्रिकरण वडा घोषणा गरिदै

असार २७, सोलुखुम्बु । हिमाली जिल्ला सोलुखुम्बुको सोलुदुधकुण्ड नगरपालिका वडा नम्बर २ बेनीलाई कृषि यान्त्रिकरण वडा घोषणा गरिने भएको छ । वडा कार्यालयको आर्थिक वर्ष २०८०/०८१ को वडास्तरीय योजना अन्तर्गत २० लाख बराबरको कृषि औजार वितरण गरी आउँदो असार ३१ गते वडालाई कृषि यान्त्रिकरण वडा घोषणा गरिने भएको हो ।

कृषिमा आधुनिकीकरणका लागि प्रविधिमा सहयोग गर्ने तर उत्पादनमा वृद्धि हुन नसके उपलब्धी नहुने भन्दै प्रविधिको माध्यमबाट उत्पादन बढाउने उदेश्यले वडालाई कृषि यान्त्रिकरण वडा घोषणा गर्न लागिएको सोलुदुधकुण्ड नगरपालिका वडा नम्बर २ का वडा अध्यक्ष ङवाङ ठिले शेर्पाले जानकारी दिनुभयो ।

उहाँले गोरुले जोतेर खेती पाती गरिरहेका किसानहरुका लागि कृषिमा भित्रिएको यान्त्रिकरणले खेती प्रणलीमा समेत सुधार हुने विश्वास व्यक्त गर्नु भएको छ । साथै कृषि सामाग्री वितरण पश्चात कृषियन्त्रको सदुपयोग गर्दै कृषि क्षेत्रको परिवर्तनमा लाग्न किसानहरुलाई आग्रह गर्नुभएको छ ।

वडा कार्यालयले साविकको १ देखि ९ वडा सम्मका किसानहरुलाई सामुहिक रुपमा कृषि औजारहरु वितरण गर्ने जनाईएको छ । कृषि सामाग्रीहरुमा कुटानी पिसानी मिल १२ थान, थ्रेसर मेसिन ९ थान, हाते ट्रयाक्टर ९ थान, ब्रस कटर अर्थात घाँस फाड्ने मेसिन ९ थान, टिम्बुर टिप्ने मेसिन १८ थान, मकै छोडाउने मेसिन ६ थान, घाँस साइज काट्ने मेसिन २ थान वितरण गरिने वडा अध्यक्ष ङवाङ ठिले शेर्पाले जानकारी दिनुभएको छ ।