जिल्ला प्रहरी कार्यालय सोलुखुम्बले गर्याे “नागरिक सुनुवाई ”कार्यक्रम

असार ३०, सोलुखुम्बु । जिल्ला प्रहरी कार्यालय सोलुखुम्बुले सेवाग्राही र सेवा प्रदायक बिचको दोहोर सम्बन्ध स्थापित गर्न नागरिक सुनुवाई कार्यक्रम आयोजना गरेको छ । सेवाग्राही र सेवा प्रदायक बिचको असमझदारीलाई हटाई सुशासन, पारदर्शीता, जवाफदेहिता र जिम्मेवारीको बोध गराई सुशासनमा सहयोग पु¥याउन प्रहरी कार्यालयले नागरिक सुनुवाई कार्यक्रम आयोजना गरेको हो ।

जिल्ला प्रहरी कार्यालय सोलुखुम्बुको आयोजनामा सोलुदुधकुण्ड नगरपालिका वडा नम्बर ४ स्थित फाप्लु सामुदायीक आँखा केन्द्रको सभाहलमा नागरिक सुनुवाई कार्यक्रम गरेको छ । आईतबार नागरिक सुनुवाई कार्यक्रममा बोल्दै प्रमुख जिल्ला अधिकारी देवि पाण्डे खत्रीले जिल्लामा घटिरहेका विविध घटनाहरुको न्युनिकरणका लागि प्रहरी मात्र नभई नागरिकको महत्वपूर्ण भूमिका रहने बताउनुभयो । नागरिकहरुले सरकारको मुख मात्र नताकि आफु स्वयमबाट पनि चेतनाको विकास गर्नु आवश्यक रहेको औँल्याउनुभयो ।

यस्तै प्रमुख अतिथिको आसनबाट बोल्दै सोलुदुधकुण्ड नगरपालिकाकी उपमेयर गान्धि माया तामाङले प्रहरी बर्दी सहितको प्रहरी हो भने नागरिक बिना बर्दीको प्रहरी भएकाले आ आफ्नो तर्फबाट घट्ना घट्न नदिन भूमिका निर्वाह गर्नु पर्ने बताउनुभयो ।

सेवाग्राही र सेवा प्रदायक बिचको असमजदारीलाई हटाई सुशासन, पारदर्शिता, जवाफदेहिता र जिम्मेवारीको बोध गराउने उद्देश्य अनुसार नागरिक सुनुवाई कार्यक्रम गरिएको जिल्ला प्रहरी कार्यालय सोलुखुम्बुका प्रमुख एवंम प्रहरी नायव उपरीक्षक द्वारीका प्रसाद घिमिरेको भनाई छ ।

उहाँले प्रहरीले गरेको काम नागरिक विच राख्न तथा नागरिक र प्रहरीको सम्वन्ध नजिक गर्न कार्यक्रम आयोजना गरिएको बताउनुभयो । उहाँले प्रहरीले गरेको काम कस्तो छ ? के भईरहेको छ भन्ने बिषयमा बुझ्न आवश्यक रहेको उल्लेख गर्नुभएको छ । उक्त कार्यक्रममा माया तामाङ र पूर्ण बहादुर नेवारले चोरी र बेपत्ता भएकी श्रिमतिको खोजिका गर्न प्रहरीलाई आग्रह गरेका छन् ।