सोलुखुम्बुको बेनी बन्यो जिल्लाकै पहिलो कृषिमा यान्त्रीकरण  वडा 

असार ३१, सोलुखुम्बु ।  सोलुखुम्बुको सोलुदुधकुण्ड नगरपालिका वडा नम्बर २ जिल्लाकै पहिलो कृषिमा यन्त्रीकरण वडा घोषणा गरिएको छ ।  आज नगरप्रमुख नाम्गेल जाङ्बु शेर्पाले वडालाई कृषिमा यन्त्रीकरण वडा घोषणा गर्नुभएको छ । एक औपचारीक कार्यक्रमका विच वडा अध्यक्ष ङवाङ् ठिले शेर्पाको अध्यक्षतामा वडालाई कृषिमा यन्त्रीकरण वडा घोषणा गरिएको हो ।

संघीयता पछि वडाले सम्पुर्ण विकासमा फड्को मारिरहेको र कृषि क्षेत्रको विकासमा पनि वडालाई एउटा उचाइ दिइएकाले वडा कृषिमा यन्त्रीकरणयुक्त वडा घोषणा गरिएको नगरप्रमुख शेर्पाले बताउनुभएको छ । सोमबार वडालाई यन्त्रीकरण युक्त वडा घोषणा कार्यक्रम तथा कृषि यन्त्र उपकरण वितरण कार्यक्रमामा वडा भरिका ७ वटा कृषि समुहहरुमा विभिन्न कृषि यन्त्र  वितरण गर्दै वडालाई कृषिमा यन्त्रीकरण वडा घोषणा गरिएको हो ।

सोलुदुधकुण्ड नगरपालिकाको  सहयोग तथा वडा नम्बर २ बेनीको २० लाख रुपैयाँ बजेटमा वडाका कृषक तथा कृषि समुहहरुलाई विभिन्न ७ प्रकारका कृषि यन्त्र उपकरण वितरण गरिएको छ । कृषि समुहहरु मार्फत सञ्चालन तथा प्रयोग हुने गरि निशुल्क कृषि यन्त्र उपकरण गरिएको वडा अध्यक्ष ङवाङ् ठिले शेर्पाको भनाई छ । कृषि समूह हरूलाई ९ वटा मिनी टिलर, ९ वटा कम्बाइन थेसर, १२ वटा कम्बाइन मिल, ब्रस कटर (घाँस काट्ने मेसिन) ९ वटा, क्रस सेलर (मकै छोडाउने मेसीन) ९ वटा, कट एण्ड होल्ड पुर्नर १८ वटा र च्याफ कटर २ वटा वितरण गरिएको छ ।  

कृषि यन्त्र उपकरण निशुल्क रुपमा पाएपछि कृषकहरूले खुसी व्यक्त गरेका छन ।  कृषिमा यन्त्रीकरण वडा घोषणा कार्यक्रममा बोल्दै नगर उपप्रमुख गान्धिमाया तामाङले कृषिकर्म गर्ने वडा बासीका लागी नगरपालिका सँधै साथ दिन तयार रहेको बताउनुभयो । उहाँले कृषि सामाग्रीहरूको समुचित प्रयोग गर्दै धेरै भन्दा धेरै लाभ लिन आग्रह गर्नुभयो ।

यस्तै नेपाली कांग्रेस नगर सभापति तथा वडा नम्बर ७ का अध्यक्ष सोनाम ग्याल्जेन शेर्पाले वडा नम्बर  २ ले गरेको यो कार्य उदाहरणीय भएको भन्दै अव कृषिमा युवाहरूको आकर्षमा मद्दत गर्ने विश्वास व्यक्त गर्नुभयो । कार्यक्रमलाई सम्बोधन गर्दै नगरपालिकाका कृषि  शाखा प्रमुख पासाङ ग्याल्जेन शेर्पाले कृषि यन्त्र उपकरण लाइ सुरक्षित रुपमा चलाउँदै वडाका किसान कृषिमा आत्मनिर्भर बन्न सक्नु पर्ने बताउनुभएको छ ।  कार्यक्रममा वडाका जनप्रतिनिधि तथा राजनैतिक दलका प्रमुख एवं प्रतिनिधि, कर्मचारी तथा स्थानीय कृषकहरूको बाक्लो उपस्थिति रहेको थियो ।