ओखलढुंगामा नयाँ दररेट कायम, श्रमिकको ज्यालादर बढ्यो

साउन २, सोलुखुम्बु । ओखलढुंगामा आर्थिक वर्ष २०८१/०८२ को लागि जिल्ला दररेट निर्धारण गरिएको छ । जिल्ला दररेट निर्धारण समितिको गत असार २४ गतेको निर्णय अनुसार जिल्लाका विभिन्न क्षेत्रमा लाग्ने कामदारको खर्च, ढुवानी खर्च लगायतका विभिन्न शीर्षकको दररेट निर्धारण गरेको हो ।

समितले कामदारहरुको ज्याला दररेट प्रति जना प्रति श्रम दिन ज्यामीको ज्याला ९ सय तोकेको छ । २०८०/०८१ मा ८ सय ८० रुपैयाँ रहेको थियो । यस्तै दक्ष कामदारको ज्याला १ हजार २ सय २० पुगेको छ । यसअघि १ हजार २ सय रुपैयाँ थियो । समितिले चेन म्यान, सर्भेयर, सर्भे हेल्पर, पियन, ड्रिलर, ब्लाष्टर, सुपरभाइजर, कम्प्युटर सेवा, प्लम्बरलगायतका कामदारहरुको समेत दररेट तोकेको छ ।

समितिले स्थानीय निर्माण सामग्रीको दररेट, मोटरबाटो सुविधा नभएको क्षेत्रमा भरियाद्वारा सामान ढुवानी गर्दाको दररेट, देशका विभिन्न भागबाट ट्रक तथा ट्याक्टरबाट ढुवानी गराउँदाको दररेट, जिल्लाभित्र ट्रक तथा ट्याक्टरबाट ढुवानी गराउँदाको दररेट समेत निर्धारण गरेको छ ।

यस्तै समितिले स्थानीय निर्माण सामग्री बाहेक जीआइ पाइप, पोलिथिन पाइप, पाइप फिटिङ तथा अन्यय सामग्रीको हकमा उदयपुर जिल्लाको दररेट लिई सो सामग्रीको ढुवानी समेत जोडी जिल्लाको दररेट कायम गर्ने निर्णय भएको छ ।