अध्यक्ष बस्नेतको मन्त्रालयमा गर्जन : भन्छन् अधिकृत पठाउँदा लेनदेन गरियो 

साउन ४, सोलुखुम्बु ।  सोलुखुम्बुको सोताङ गाउँपालिकाका अध्यक्ष खिलाराज बस्नेतले सङ्घीय मामिला तथा सामान्य प्रशासन मन्त्री राजकुमार गुप्तालाई भेट गरेर स्थानीय तहमा अधिकृत पठाउँदा समन्वय गर्न का लागी ध्यानाकर्षण गराउनुभएको छ ।

गुप्ताले मन्त्रालय सम्हालेको ४ दिन पछिनै अध्यक्ष बस्नेतले मन्त्रालय पुगेर गाउँपालिकामा प्रमुख प्रशासकीय अधिकृतको व्यवस्थापन गर्दा समन्वय गरेर पठाउन अनुरोध गर्नुभएको छ ।  उहाँले प्रमुख प्रशासकीय अधिकृत पठाउँदा स्थानीय सरकारको गतिलाई समात्न सक्ने अधिकृत पठाउनु जरुरी रहेको उल्लेख गर्नुभएको छ ।

विभिन्न स्थानीय तहका प्रमुखहरू सहितको टोलीसँग मन्त्रालय पुग्नुभएका अध्यक्ष बस्नेतले मन्त्रालयमा आउने मन्त्रीहरूले अथवा अन्य कर्मचारीहरूले पनि प्रमुख प्रशासकीय अधिकृत पठाउँदा लेनदेनको विषय बाहिर सुनिने गरेको पनि बताउनुभयो । कर्मचारी हरू स्थानीय सरकारको स्थायी सरकार भएको भन्दै उहाँले स्थानीय तहमा अधिकृत पठाउँदा  मापदण्ड बनाएर पठाउन पनि अनुरोध गर्नुभएकाे छ । 

उहाँले बजेट कटौती लगायतका समस्याका कारण स्थानीय सरकारले सोचेजस्तो काम गर्न नसकेको भन्दै यस्ता समस्या समाधानका लागी सम्बन्धित  मन्त्रालय संवेदनशिल बन्नुपर्ने सुझाव दिनुभएको छ  ।  अध्यक्ष बस्नेतले अाजै अन्य विभिन्न मन्त्रालयका मन्त्रीहरूलाइर् भेट गरि बधाइ तथा शुभकामना समेत व्यक्त गर्नुभएकाे छ ।