नेचासल्यान गाउँपालिकाको प्रशासकीय भवन शिलान्यास (हेर्नुस भिडियाे सहित) 

सोलुखुम्बु, बैशाख १० । सोलुखुम्बुको नेचासल्यान गाउँपालिकाको प्रशासकीय भवन शिलान्यास गरिएको छ । आज एक कार्यक्रमका बिच वडा नम्बर ३ बिहिवारेमा पञ्चिशलाकाे पुजाअाजा गरि  गाउँपालिका अध्यक्ष धनजन राई तथा उपाध्यक्ष विना राईले प्रशासकीय भवनको शिलान्यास गर्नुभएको हो । 

नेपाल सरकारको समपूरक अनुदान ८० लाख र गाउँपालिकाको बाँकी गरि कुल जम्मा  ३ करोड ७२ लाखमा निर्माण सम्पन्न गर्ने गरि आरोन, ओम बालाजी, पीआर जेभिले भवन निर्माणको जिम्मा लिएको छ । भवन निर्माणको काम आगामी चैत्र मसान्त सम्म सम्पन्न गरिसक्नुपर्ने गरि सम्झौता भएको गाउँपालिकाका सव इन्जिनियर जयप्रकाश सिंहले बताउनुभयो ।  

अहिले साविकको गाविस भवनलाई मर्मत सम्भार गरेर सकसपूर्ण सेवा प्रवाह गरिरहेको पालिकाले नयाँ भवन पाउने भएपछि राहतको महसुस गरेको गाउँपालिकाका उपाध्यक्ष विना राईले बताउनुभयो । उहाँले नयाँ भवन निर्माण भैसकेपछि जनतालाई सरकारी सेवा दिन सहज हुने पनि बताउनुभएको छ ।

शिलान्यास कार्यक्रममा गाउँपालिका अध्यक्ष  धनजन राई उपाध्यक्ष विना राई, छिमेकी जिल्ला खोटाङको दिक्तेल रूपाकोट मझुवागढी नगरपालिकाका मेयर तीर्थराज भट्टराई नेचासल्यान गाउँपालिकाका सबै वडाका वडा अध्यक्षहरू लगायत स्थानीय सरोकारवाला सँगै पालिकाका कर्मचारी लगायतको उपस्थिति रहेको थियो ।