सोताङ गाउँपालिकामा ७४ जनाले पाए १०० दिने रोजगारी

असार १३, सोलुखुम्बु । सोलुखुम्बुको सोताङ गाउँपालिकामा आर्थिक वर्ष २०८०/८१ मा ७४ जनालाई प्रधानमन्त्री रोजगार कार्यक्रमअन्तर्गत १०० दिनको रोजगारी प्रदान गरिएको छ । सोताङ गाउँपालिका रोजगार शाखाका संयोजक लक्ष्मी ओलीका अनुसार गाउँपालिकाले आर्थिक वर्ष २०८०/८१ मा प्रधानमन्त्री रोजगार कार्यक्रम अन्तर्गत २० लाख बजेट विनियोजन गरी ५ वटै वडाका युवाहरुलाई रोजगार दिइएको हो ।

बजेट अभावले स्थानीय तहको प्राथमिकीकरण सूचीमा परेको व्यक्तिलाई मात्र रोजगारी दिइएको उहाँको भनाई छ । रोजगारी प्राप्त ७४ जना श्रमिकले विभिन्न १० वटा योजनामा दैनिक ८ सयका दरले ज्याला प्राप्त गरेको रोजगार संयोजक ओलीले बताउनुभयो ।

पालिका भित्रको सडक सोलिङ, ग्राभेल, लगायत सडक मर्मतको काम युवाले गत मंसिर महिनाको पहिलो हप्ता देखि सुरु गरी सम्पन्न गरेका छन् । एक आर्थिक वर्षमा सरकारले तोकेको न्यूनतम पारिश्रमिक बराबरको आयभन्दा कम आय भएको र न्यूनतम एक सय दिनको रोजगारीमा संलग्न नभएको व्यक्ति स्थानीय तहको बेरोजगार व्यक्तिको सूचीमा सूचीकृत हुन आवेदन गर्नसक्ने प्रावधान छ।

प्रधानमन्त्री रोजगार कार्यक्रमअन्तर्गत कामका लागि पारिश्रमिकमा आधारित सामुदायिक आयोजना, नेपाल सरकारको स्रोत र युवा रोजगारीका लागि रुपान्तरण पहल आयोजना, विश्व बैंकको ऋण सहयोगबाट स्थानीय तहमा आव २०७५/७६ देखि रोजगारीको प्रबन्ध हुँदै आएको छ ।