देउपुजेका अग्निपीडिलाई प्रशासनको राहात ः नगद र लत्ताकपडा

सोलुखुम्बु, १२ वैशाख ।
वनबाट सल्किएको आगो गाउँमा पस्दा घरनै सखाप भएका सोलुखुम्बुको नेचासल्यान–२ का अग्निपीडित परिवारलाई जिल्ला प्रशासन कार्यालय लगायतका निकायले राहात वितरण गरेो छ ।
मंगलबार अपरान्ह भएको आगलागिबाट जलेर घरविहीन बनेका देउपुजे गाउँका ३ परिवारलाई जिल्ला विपद व्यवस्थापन समितिको तर्फबाट प्रमुख जिल्ला अधिकारी देवी पाण्डे खत्रीले राहात वितरण गर्नुभएको हो । आगलागिका कारण घर गुमाएका स्थानीय शक्ति राई, मक्कर बहादुर राई र करविर राईको परिवारलाई राहात प्रदान गरिएको हो । समितको तर्फबाट प्रजिअ पाण्डे र प्रहरी नायव उपरिक्षक द्वारिका प्रसाद घिमिरेले शक्ति राईका श्रीमति सान्ता राई र मकर राईकी श्रीमति रत्ना राईलाई नगद १५ हजारको साथमा ३ थान त्रीपाल, ३ थान कम्बल, ३ थान रजाई र १ थान ब्लांकेट हस्तान्तरण गर्नु भएको हो । करबिर राई जिल्ला बाहिर रहेकाले छिमेकी नारायण राईलाई ३ थान त्रीपाल, ३ थान कम्बल, ३ थान रजाई र १ थान ब्लांकेट बुझाईएको छ ।
प्रमुख जिल्ला अधिकारी नेतृत्वको टोली पीडितलाई भेट्न घटनास्थल नै पुगेको हो । सो अवसरमा नेचासल्यान गाउँपालिका अध्यक्ष धनजन राई, प्रमुख प्रशासकि अधिकृत युवराज पोख्रेल, २ नम्बर वडाअध्यक्ष सिताराम काफ्ले लगायतको उपस्थिति रहेको थियो । हिजो लागेको आगोका कारण ३ परिवारको ५ वटा घर जलेर नष्ट भएको थियो । घर भित्र रहेको सबै समानहरु जल्दा ५३ लाख बराबरको क्षति भएको जिल्ला प्रहरी कार्यालय सोलुखुम्बुका प्रमुख डिएसपि द्वारिका घिमिरेले जानकारी दिनुभयो । नेपाल प्रहरी, शसस्त्र प्रहरी, नेपाली सेना, सोलुदुधकुण्ड नगरपालिकको दमकल र स्थानीयको सक्रियतामा राति अबेर सम्ममा आगो नियन्त्रणमा आएको थियो । आगलागि पीडितलाई रेडक्रस, स्थानीय प्रशासन र स्थानीय सरकारको तर्फबाट राहात आउनेक्रम शुरु भएको छ ।