सगरमाथा क्षेत्रमा विना अनुमति उडाईएको ड्रोन जफत

१२ वैशाख, सोलुुखुम्बु ।
सगरमाथा क्षेत्रमा विना अनुमति उडाईएको ड्रोन क्यामेरा प्रहरीले जफत गरेको छ । खुम्बुपासाङल्हमु गाउँपालिका वडा नम्बर ४ दिङबुचे क्षेत्रबाट विदेशी नागरिकले गैह्रकानुनी रुपमा उडाएको ड्रोन नेपाल प्रहरीले नियन्त्रणमा लिएको छ ।
सगरमाथाको आधार शिविर क्षेत्रको भ्रमणमा आएका पोल्याण्डका नागरिकले अनाधिकृत रुपमा ड्रोन उडाएको भन्ने स्थानीयको सुराकीको आधारमा अस्थाई प्रहरी चौकी दिङबुचेबाट खटिएको प्रहरी टोलीले मंगलबार डिजेआई कम्पनीको ड्रोन क्यामेरा नियन्त्रणमा लिएको हो । उक्त ड्रोन क्यामेरा सगरमाथा राष्ट्रिय निकुन्जलाई जिम्मा लगाईएको प्रहरी नायव उपरिक्षक द्वारिका प्रसाद घिमिरेले जानकारी दिनुभयो । निकुन्ज तथा अन्य संरक्षित क्षेत्रमा ड्रोन उडाउनका लागि नागरिक उड्यान प्राधिकरण, रक्षा मन्त्रालय र राष्ट्रिय निकुन्ज विभाग र स्थानीय प्रशासन समेतको अनुमति आवश्यक पर्छ तर ती विदेशी नागरिकले कुनै प्रकृया पुरा गरेको नदेखिएकाले प्रहरीले सामान जफत गरेको हो ।