खोटाङको दिप्रुङका ३०  प्रतिशत मात्र विद्यार्थी कक्षा १२ उत्तीर्ण 

साउन २२, सोलुखुम्बु । खोटाङको दिप्रुङ चुइचुम्मा गाउँपालिकाबाट कक्षा १२ को  परीक्षा दिएका मध्ये ३० प्रतिशत विद्यार्थीले मात्र परिक्षा उत्तीर्ण गरेका छन् । राष्ट्रिय परीक्षा बोर्डले लिएको कक्षा १२ को परीक्षामा सामेल भएका गाउँपालिकाका २ सय ३९ विद्यार्थीहरू मध्ये ७३ विद्यार्थीले मात्र कक्षा १२ को परीक्षा उत्तीर्ण गरेको दिप्रुङ चुइचुम्मा गाउँपालिका शिक्षा शाखाले जनाएको छ ।  गाउँपालिकामा रहेका ५ वटा मावि मध्ये सबैभन्दा धेरै विद्यार्थी महेन्द्रोदय माध्यमिक विद्यालय ओख्रेबाट उत्तीर्ण भएका छन भने शान्ती मावि छोरम्बुले निल खाएको छ ।

 महेन्द्रोदय माध्यमिक विद्यालय का ४६ विद्यार्थी उत्तीर्ण भएका छन्।  उक्त विद्यालयबाट ५८ जना विद्यार्थीले परीक्षामा सहभागिता जनाएका थिए ।  यस्तै जनता माध्यमिक विद्यालय बतासेका ३३ विद्यार्थीले परीक्षामा सहभागिता जनाएकोमा १६ विद्यार्थी मात्र उत्तीर्ण भएका छन ।  गाउँपालिकाकै सरस्वती माध्यमिक विद्यालय डाँडागाउँबाट ६३ विद्यार्थीले परीक्षा दिएकोमा ७ विद्यार्थी उत्तीर्ण भएका छन भने अन्य विद्यार्थीले फेरी परीक्षा दिनुपर्ने भएको छ ।  

यस्तै कृष्ण मावि टेम्मा बाट परीक्षा दिएका ५० विद्यार्थी मध्ये ४ विद्यार्थी उत्तीर्ण भएका छन भने शान्ती मावि छोरम्बुबाट परीक्षामा सहभागिता जनाएका ३१ विद्यार्थी मध्ये सबैको नतिजा एनजिमा आएको छ ।  गाउँपालिकाको यो नतिजा विगत ४ वर्ष देखिने यस्तै कायम रहिआएको भन्दै गाउँपालिकाका प्रमुख प्रशासकीय अधिकृत पिएसपि चाम्लिङले तत्काल सुधार गर्न सम्भावना नरहेपनि अबको १० वर्ष पछिको नतिजा शतप्रतिशत बनाउने गरि गाउँपालिकाले शिक्षा क्षेत्रमा काम गरिरहेको दावी गर्नुभयो ।