खार्मिका वडा अध्यक्ष राईको दैनिकी बाह्रै महिना श्रमदानमा

साउन २२, सोलुखुम्बु । खोटाङको दिक्तेल रुपाकोट मझुवागढी नगरपालिका–११ खार्मीका वडाध्यक्ष ईखबहादुर राईको दैनिकी नागरिकसँगै सडक मर्मतमा बित्ने गरेको छ । वडा कार्यालयको दैनिक काम तथा नगर कार्यपालिकाको बैठकबाहेक अन्य समय नागरिकसँगै सडक मर्मतमा बित्ने गरेको हो ।

वडाध्यक्ष राईसँगै श्रमदान अभियानमा स्थानीय बासिन्दाले समेत कम्मर कसेर साथ दिएका छन् । वडाध्यक्ष राईले सुरु गरेको श्रमदानमार्फत सडक मर्मत गर्ने अभियानले खार्मीबाट हुर्लुङ हुँदै दिक्तेल तथा राजधानी काठमाडौँ लगायत पूर्वी तराईका विभिन्न सहर आवतजावतमा सहज भएको छ ।

यसअघि हिउँदमा दुःखका साथ करिब ६ महिनामात्र सञ्चालन हुने सडक श्रमदानमार्फत मर्मत गरिएका कारण बाह्रै महिना यातायात सञ्चालन भएपछि स्थानीय उपभोक्ता समेत हर्षित भएका छन् । खार्मीले जनताको प्रमुख समस्या सडक भएकाले बाह्रै महिना यातायात सञ्चालन गर्नेगरी श्रमदान अभियान सञ्चालन गरिएको वडाध्यक्ष राईले बताउनुभयो ।

बाह्रै महिना सडक सञ्चालन भएमा कसैले पनि अकालमा ज्यान गुमाउनु पर्दैन भन्ने उहाँको बुझाई छ । वडाध्यक्ष राईले सुुरु गरेको श्रमदान अभियानको सुुरुदेखि अहिलेसम्म स्थानीय भुवन राई, हेमन्त राई, राम तामाङ, ओमन श्रेष्ठ, राजन तामाङ लगायत युवाले निरन्तर साथ दिइरहेका छन् ।