चिशंखुगढी बन्यो पुर्ण खोप सुनिश्चित पालिका, क्षयरोग मुक्त अभियान चलाउन समिति गठन 

ओखलढुङ्गाको चिशंखुगढी गाउँपालिका पूर्ण खोप युक्त पालिका घोषणा गरिएको छ ।  आज गाउँपालिकामा आयोजित एक कार्यक्रममा गाउँपालिकाका सबै वडाका खोप लगाउने उमेर समुहका बालबालिकाले खोप पाइसकेको सुनिश्चित भएपछि गाउँपालिकालाई पुर्ण खोप सुनिश्चितता तथा दिगोपना पालिका घोषणा गरिएको हो ।

गाउँपालिका अध्यक्ष निशान्त शर्माको अध्यक्षतामा सम्पन्न एक कार्यक्रमका विच स्वास्थ्य शाखा प्रमुख थिर प्रसाद भट्टराईले पालिकाका खोप लगाउने उमेर समुहका सबे बालबालिकाले खोप पाइसकेकाले पूर्ण खोप सुनिश्चित पालिका घोषणाका लागी प्रस्ताव गर्नुभएको थियो ।

गाउँपालिकाका ०–१५ महिनाका २०१ जना बालबालिकाहरूले नियमित खोप सेवा लिइरहेको र १६ महिना देखि ५ वर्ष सम्मका ६२८ जना बालबालिकाहरूले पूर्णखोप प्राप्त गरेको आधारमा गाउँपालिका पर्ण खोप सुनिश्चित गाउँपालिका घोषणा गरिएको जनाइएको छ  । यस्तै चिशंखुगढी गाउँपालिकामा क्षयरोग मुक्त अभियानका लागी समिति गठन गरिएको छ ।  आजै गाउँपालिकामा आयोजित एक कार्यक्रमका बिच गाउँपालिका अध्यक्ष निशान्त शर्माको संयोजकत्व तथा उपाध्यक्ष सन्तोष बाबु थापाको सह संयोजकत्वमा १९ सदस्यीय समिति गठन गरिएको छ ।

समितिले पालिकाबाट प्रदान गरिने सेवाहरूको गुणस्तरीयतामा वृद्धि गराउँदै क्षयरोग मुक्त अभियान कार्यक्रमको लक्ष हासिल गर्न प्रभावकारी रुपमा कार्य सञ्चालन गर्ने साथै सबै स्वास्थ्य संस्थाले शतप्रतिशत लक्ष्य हासिल गर्ने गरि कार्य गर्न अध्यक्ष शर्माले निर्देश गर्नुभएको छ ।  यस्तै आजै पालिकामा रहेका ८ स्वास्थ्य संस्था मध्ये खोप कार्यक्रमका सुचकाङ्कका आधारमा पोखरे स्वास्थ्य चौकी उत्कृष्ट स्वास्थ्य संस्था छनौट भएको छ ।

कार्यक्रममा स्वास्थ्य कार्यालय ओखलढुङ्गाका प्रमुख कर्मचन्द्र राजवंशीको प्रमुख आतिथ्यता रहेको थियो भने  गाउँपालिका उपाध्यक्ष सन्तोष बाबु थापा, प्रमुख प्रशासकीय अधिकृत सिताराम राई, वडा अध्यक्षहरू क्रमशःः उषक कटवाल, नरेन्द्र बस्नेत,  भीष्म श्रेष्ठ, हिमाल राई,  नेत्र भट्टराई, सुशील जङ्ग कार्की लगायतको उपस्थिति रहेको थियो । यस्तै पालिका खोप समन्वय समितिका पदाधिकारीहरू, स्वास्थ्यकर्मी महिला स्वास्थ्य स्वयंसेविका गै.स.स. का प्रतिनिधिहरू तथा सरोकारवालाहरूको उपस्थिति रहेको थियो ।