एन्जल बनिन १४ औं मिस मंगोल नेपाल

भदौ २, सोलुखुम्बु । ‘मिस मङ्गोल नेपाल–२०२४’को उपाधि खोटाङकी एञ्जल राईले जित्नुभएको छ । ऐसेलुखर्क गाउँपालिका–७ माक्पाकी २३ वर्षीया एञ्जलले १४ औँ संस्करणको उपाधि सहित एक लाख नगद पुरस्कार प्राप्त गर्नुभएको छ ।

नेपाल आदिवासी जनजाति महासङ्घको सहकार्यमा एक्सन इन्टरटेनमेन प्रा.लि.ले आयोजना गरेको प्रतियोगितामा एञ्जलले ‘मिस ट्यालेन्ट’को उपाधिसमेत हात पार्नुभएको आयोजक एक्सन इन्टरटेनमेनका अध्यक्ष अशोक प्यासी राईले जानकारी दिनुभयो । स्नातक उत्तिर्ण गर्नुभएकी उपाधि विजेता एञ्जलले प्रभु बैङ्क, नेपाल आदिवासी जनजाति महासङ्घ, रिडी ग्रुप लिमिटेड तथा नेपाल क्यान्सर निवारण प्रतिष्ठानको सद्भावना दूत भइ काम गर्ने अवसरसमेत प्राप्त गर्नुभएको छ ।

३० औँ विश्व आदिवासी दिवसको अवसर पारेर काठमाडौँको जमलस्थित राष्ट्रिय नाचाघरमा आयोजित प्रतियोगितामा पाँचथरकी बिपिका लिम्बु फस्ट रनरअप हुनुभएको छ । स्नातक अध्ययनरत २१ वर्षीया लिम्बुले रु ५० हजार पुरस्कार पाउनुभएको छ । प्रतियोगितामा बाराकी १७ वर्षीया शाहिशा राईले ‘मिस मङ्गोल मधेश’सहित सेकेन्ड रनरअपको उपाधि चुम्न सफल हुनुभएको छ । शाहिशालाई २५ हजार नगद पुरस्कार प्रदान गरिएको आयोजकले जनाएको छ ।