ऐसेलुखर्क बजारमा लाखेको मूर्ति निर्माण, पालिका अध्यक्ष राईले गरे अनावरण

भदौ ३, सोलुखुम्बु । खोटाङको ऐसेलुखर्क गाउँपालिका वडा नम्बर ३ ऐसेलुखर्क बजारमा लाखेको मूर्ति निर्माण गरी अनवारण गरिएको छ । १ सय ६३ वर्ष पहिले देखिको लाखे नाच हुदै आएको मुकुटलाई ऐसेलुखर्क गाउँपालिकाको आर्थिक सहयोगमा नेवार सामाजिक गुठिको आयोजनामा निर्माण गरी सोमबार जनै पूर्णिमाका दिन अनावरण गरिएको हो ।

गाउँपालिकाको आर्थिक वर्ष २०७९/०८० र २०८०/०८१ मा विनियोजित १६ लाख लागतमा निर्माण गरिएको मूर्तिको नेवार सामाजिक गुठिका अध्यक्ष ध्रुवराज राजभण्डारीको अध्यक्षता तथा ऐसेलुखर्क गाउँपालिकाका अध्यक्ष गिरेन्द्र बहादुर राईको प्रमुख आतिथ्यतामा मूर्ति अनावरण गरिएको जनाइएको छ ।

ऐसेलुर्खक बजारमा नेवारी बस्ति भएकाले नेवार समुदायको धर्म, संस्कृतिलाई जगेर्ना गर्ने उदेश्यले गाउँपालिकाले बजेट विनियोजन गरी लाखेको मूर्ति निर्माण गरिएको गाउँपालिका अध्यक्ष गिरेन्द्र बहादुर राईले बताउनुभयो । नेवार समुदायको रितिरिवाजलाई मात्र नभई आगामी दिनहरुमा अन्य जातजातिको संस्कार, संस्कृतिलाई समेत प्रवद्र्धन गर्दै जाने अध्यक्ष राईले प्रतिबद्धता व्यक्त गर्नुभएको छ ।

विगत १ सय ६३ वर्षमा यहाँकै स्थानीयहरुले गुरासको फेदबाट निर्माण गरिएको मुकुट अझै पनि सुरक्षित रहेकाले यसको पहिचानकै लागि ऐसेलुखर्क बजार स्थित पिङ डाँडामा मुर्ति स्थापना गरिएको नेवार सामाजिक गुठिका सचिव प्रमोद राजभण्डारीले जानकारी दिनुभयो ।