संखुवासभामा स्वास्थ्यकर्मीमाथि कुटपिट

भदौ ४, सोलुखुम्बु । संखुवासभाको नागरिक आरोग्य सेवा केन्द्र पाँच खपनका इन्चार्जमाथि कुटपिट भएको छ। जिल्लामा पछिल्लो समय राजनीतिक दलको आडमा कर्मचारीमाथि निरन्तर आक्रमण हुन थालेको छ।

नागरिक आरोग्य सेवा केन्द्र पाँचखपन नगरपालिका–२ स्थित टाइगरचोकका इन्चार्ज ज्ञानेन्द्रप्रसाद शाहमाथि कुटपिट भएको जिल्ला आयुर्वेद स्वास्थ्य केन्द्र संखुवासभाका प्रमुख रामप्रमोध चौधरीले जानकारी दिनुभयो ।

नागरिक आरोग्य सेवा केन्द्र पाँचखपनका इन्चार्ज शाहमाथि कार्यालय परिसरमै पाँचखपन–२ का भीषण जिमीले कुटपिट गरेको जिल्ला आयुर्वेद स्वास्थ्य केन्द्रका प्रमुख चौधरीले बताउनुभयो । आरोपित जिमीले नागरिक आरोग्य सेवा केन्द्रका इन्चार्ज शाहमाथि औषधि किन्ने बाहनामा कार्यालय परिसर भित्रै कुटपिट गरेको थिए।

पहिलो चरणमा सम्झाइबुझाइ गरे पनि जिमीले राति फेरि खुकुरी लिएको शाहको कोठामा पुगेर धम्की दिएका थिए । सोमबार शाहले प्रहरीमा जाहेरी दर्ता गराए पनि उनी पक्राउ परेका छैनन्। गत साउन १५ गते नेपाल विद्युत प्राधिकरण शाखा कार्यालय मादीका इन्चार्ज राजकुमार राई र प्रदीप जिमीमाथि कुटपिट भएको थियो ।