खुम्बु पासाङल्हामु गाउँपालिकाद्वारा राहत, पुनस्थापना र पुनर्निमाणमा सहयोगको आह्वान

भदौ ५, सोलुखुम्बु । गत साउन ३२ गते शुक्रबार भीषण बाढीले बगरमा परिणत भएको थामे गाउँमा राहत, पुनर्स्थापना र पुनर्निमाणका लागि खुम्बु पासाङल्हामु गाउँपालिकाले आह्वान गरेको छ । गाउँपालिकाले मंगलबार सार्वजनिक अपिल गर्दै सहयोगका लागि व्यक्ति तथा संघसंस्थाहरुलाई आग्रह गरेको हो ।

थामे बस्ती भन्दा माथिबाट हिम पोखरी फुट्दा आएको बाढीले एउटा विद्यालय सहित १८ व्यवसायिक एवं आवासीय भवन बाढीले बगाएको गाउँपालिकाका अध्यक्ष मिङ्मा छिरी शेर्पाले बतानुभएको छ । अन्य कयौँ घरहरू समेत कटानको जोखिममा रहेको उहाँको भनाई छ ।

बाढी प्रभावितहरूलाई तत्काल राहत तथा पुनर्स्थापनाका लागि ठुलो रकम आवश्यक पर्ने भएकोले सहयोगका आह्वान गर्नु परेको अध्यक्ष शेर्पाले बताउनुभयो । महंगो दुवानी भाडा, क्षतिग्रस्त संरचनाको अवस्था समेतलाई दृष्टिगत गर्दा विपद् पश्चातका सम्पूर्ण कार्य गर्न गाउँपालिकाको लगानी मात्र पर्याप्त नहुने देखिएको गाउँपालिका अध्यक्ष शेर्पाले आह्वान गरेको अपिलमा उल्लेख गरिएको छ ।

विपदको यस घडिमा राहत तथा पुनःस्थापना लगायतका कार्यका लागि सरकारी, गैर सरकारी, व्यक्तिगत तथा संस्थागत रुपमा आर्थिक सहयोगको अपिल गर्दै आर्थिक सहयोग गर्न चाहनु हुने सबैले एकद्वार प्रणाली मार्फत सहयोग गर्न खुम्बु पासाङल्हामु गाउँपालिकाद्धारा आग्रह गरिएको छ ।