१७ बैशाख, सोलुखुम्बु । देउपुजे अग्निपीडितको सहयोगार्थ सुरु गरिएको सहयोग संकलन अभियान मार्फत करिव ६ लाख .सहयोग संकलन भएको छ । गत ११ गते साेलुखुम्बुकाे नेचासल्यान गाउँपालिका २ देउपुजेकाे स्थानीय गाइखर्क सामुदायिक बनमा लागेको डढेलोले त्यहाँका ३ परिवारको घर मतान जल्दा ५३ लाख बढीको क्षति भएको थियो ।
उक्त आगलागीबाट लाखौको क्षति व्यहोरेका धनेश्वर राई, मक्कर राई र करवीर राइको उठीबासै भएको थियो । सो घटनाका आगलागी पीडितहरूका लागी सहयोग जुटाउन १२ गते सुरु गरिएको अभियानमा ५ दिनमै करिव ६ लाख रुपैयाँ सहयोग रकम संकलन भएको अभियन्ता द्रोण बाँस्तोलाले जानकारी दिनुभयो ।
पीडित परिवारको राहतका लागी सुरु गरिएको अभियानमा देश तथा विदेशबाट सहयोग प्राप्त भएको उहाँको भनाई छ । सहयोग रकम चाँडै पीडित परिवारको हात सम्म पुर्याइने उहाँले बताउनुभयो । आगलागीबाट धनेश्वर राई र शक्ति राईको २३ लाख, केशव राईको २० लाख र करवीर राईको १० लाख बराबरको क्षति भएको थियो ।
Discussion about this post