पहिलाेटक हिमालको फोहोर सङ्कलनका लागी ड्रोनको प्रयाेग (हेर्नुस भिडियाे सहित)

सोलुखुम्बु, बैशाख १७ । सगरमाथा क्षेत्रमा हुने फोहोर जन्य बस्तु सङ्कलनका लागी ड्रोनको प्रयोग परिक्षण सुरु गरिएको छ ।  सोलुखुम्बुको खुम्बु पासाङल्हामु गाउँपालिकाले सगरमाथा क्षेत्रमा हुने विभिन्न खाले फोहोर जस्तै मानव मलमूत्र, अन्य फोहोर सङ्कलनका लागी आइतबार बाट ड्रोन प्रयोगको परिक्षण सुरु गरेको हो ।

विश्वको सर्वोच्च शिखर सगरमाथा रहेको गाउँपालिकाले हिमाल आरोहणका क्रममा त्यहाँ उत्सर्जन हुने फोहोर बस्तुको संकलन तथा आकस्मिक सेवाहरू प्रदान गर्न छिटो र छरितो माध्यम खोजी गर्ने क्रममा ड्रोनको प्रयोग परिक्षण सुरु गरेको गाउँपालिका अध्यक्ष मिङ्मा छिरी शेर्पाले बताउनुभयो । उहाँले गाउँपालिकाले ड्रोन कम्पनी डि.जे.आइ (DJI) सँग समन्वय गरेर हाललाई परीक्षणका लागी प्रयोग गरिरहेको र यसको प्रभावकारिता हेरेर हिमालमा प्रयोग गर्न सकिने बताउँनुभयो । हिमाल आरोहणलाई व्यवस्थित बनाउन यो प्रयोग उपयुक्त हुनेमा अध्यक्ष शेर्पाले विश्वास व्यक्त गर्नुभएको छ ।

 परिक्षण का क्रममा पहिलो पटक सगरमाथाबाट ९ केजी फोहोर बेसक्याम्प झारिएको छ । परीक्षणको पहिलो दिन ६ हजार ५ सय मिटरको उचाइ सम्म पुगेको यो ड्रोनले ३० केजी सम्म बोक्न सक्ने उहाँले बताउनुभयो । सोमबार थप परिक्षण उडान गरिने पनि जनाईएको छ । अध्यक्ष शेर्पाले यसको सफल परिक्षण भयो भने धेरै कुरामा सहज हुने बताउनुभयो । आरोहणका क्रममा अक्सिजन, औषधि लगायत आपुर्तिमा ड्रोन प्रयोग गरेर आरोहीलाई मद्दत पनि गर्न सकिने भएकाले उद्धार (रेस्क्युका) लागी पनि ड्रोन उपयुक्त हुने उहाँको विश्वास छ ।