एपेक्स मकालु हाइड्रोलाई स्थानीयको ध्यानाकर्षण, ५ दिन भित्र माग सम्बोधन नगरे खरो उत्रने चेतावनी

सोलुखुम्बु, बैशाख १७ । सोलुखुम्बुको महाकुलुङ गाउँपालिकामा निर्माणाधीन एपेक्स मकालु हाइड्रो पावर कम्पनीले पूर्व सर्त अनुसार काम नगरेको भन्दै स्थानीयले ध्यानाकर्षण गराएका छन । गत १५ गते एपेक्स मकालु हाइड्रो पावर संघर्ष समितिले एक ध्यानाकर्षण पत्रमार्फत हाइड्रो पावर कम्पनीलाई २०७९ मंसिर २२ गतेको सम्झौता बमोजिम नभएको भन्दे पुनः स्मरण सहित ध्यानाकर्षण गराएका हुन ।  तत्कालीन सम्झौता पत्रमा भनिएका मागहरू पुरा नगरे हाइड्रो पावरको काम अनिश्चतकालका लागी रोकिने चेतावनी ध्यानाकर्षण पत्रमा दिइएको छ ।

 एपेक्स मकालु हाइड्रो पावर कम्पनीका प्रमुख कार्यकारी अधिकृतलाई ध्यानाकर्षण पत्र मार्फत हाइड्रो पीडित समुदायहरूले महाकुलुङ गाउँपालिकाको वडा नम्बर ३ वातेल्माको सडक स्तरोन्नति गरि बाह्रै महिना चल्ने बनाइनुपर्ने माग राखेका छन ।

 यस्तै वातेल्मामा मोटरेवल पुल बनाउनुपर्ने, रूख विरूवा लगायतको क्षतिपुर्ति दिने भनिएकोमा हाल सम्म काटिसकिएको तर मल्याङ्कन नगरिएकोमा छलफल गर्नुपर्ने, हाइड्रो निर्माणको काममा स्थानीयलाई प्राथमिकता दिनुपर्ने, श्रोत साधन सम्बन्धित वडाकै प्रयोग गर्नुपर्ने, सामाजिक उत्तरदायित्वको बजेट मार्फत सडक ट्रयाक ओपन गर्नुपर्ने लगायतका माग राखेका छन ।  

यस्तै उनीहरूले नयाँ माग थप गरेर अन्य १० मागहरू पुनः ध्यानाकर्षण पत्रमार्फत राखेका छन । संघर्ष समितिका सह संयोजक सरोज कुलुङ सहित ७० स्थानीय द्वारा हस्ताक्षरित ध्यानाकर्षणपत्रमा बैशाख २१ गते सम्ममा मागहरुको सम्बोधन गर्नुपर्ने जनाइएको छ ।  पटकपटक मौखिक ध्यानाकर्षण गराउँदा पनि उचित सम्बोधन नगरेपछि चेतावनी सहित पत्रनै लेख्नुपर्ने बाध्यकारी अवस्था सृजना भएको स्थानीय हाइड्रो पीडित कुविर कुलुङले बताउनुभयो । तोकिएको मिति सम्म सम्बोधन नगरे सिंगो वातेल्मा सङ्घर्षमा उत्रने कुलुङको भनाई छ ।