सेनानी बस्नेत सोलुखुम्बुबाट विदाई,  शान्ति मिसनका लागी कङ्गो जाँदै

भाद्र ६, सोलुखुम्बु । दुर्गा बक्स गण सुरक्षा गुल्म सल्लेरी सोलुखुम्बुका सेनानी नवराज बस्नेत सोलुखुम्बुबाट बिदाई हुनु भएको छ ।  करिव १० महिना सोलुखुम्बुको सान्ती सुरक्षा प्रत्याभूतका अहम भूमिका निर्वाह गरेर महत्वपूर्ण योगदान गर्नुभएका सेनानी बस्नेतलाई बुधबार जिल्ला प्रशासन कार्यालय सोलुखुम्बुमा ससम्मान बिदाई गरिएको छ ।

गत वर्ष कार्तिक १७ गते सोलुखुम्बु सरुवा भइ आउनुभएका सेनानी बस्नेत जिल्लामा १० महिने बसाइ पुरा गरेर सान्ती मिसनमा जानको लागी बुधबार सोलुखुम्बुबाट बिदाई हुनुभएको हो  । आपतकालीन अवस्था, विपद र सान्ती सुरक्षामा सोलुखुम्बुमा नेपाली सेनाको उपस्थिति प्रशंसनीय बनाउँदै १० महिना व्यतीत गर्नुभएका सेनानी बस्नेतलाई जिल्ला स्थित सम्पूर्ण सरकारी कार्यालयका प्रमुखहरूले शुभकामना सहित विदाई गरेका छन् ।  

सेनानी बस्नेत आगामी  ५ महिना सम्म पाँचखाल काभ्रेमा हुने तालिममा सहभागी भएर त्यसपश्चात्  डेमोक्रेटिक रिपब्लिक अफ कङ्गोमा सान्ती मिसनमा जानको लागी सल्लेरीबाट बिदाई भएको जनाइएको छ ।  बुधबार बस्नेतलाई बिदाई गर्नका लागी प्रमुख जिल्ला अधिकारी देवी पाण्डे खत्री सहित नेपाल प्रहरी सोलुखुम्बुका प्रमुख डीएसपी द्वारिका घिमिरे, सशस्त्र प्रहरी सोलुखुम्बुका प्रमुख डीएसपी गोविन्द पोखरेल लगायत जिल्लाका सम्पूर्ण सरकारी कार्यालयका  प्रमुखहरू जिल्ला प्रशासन कार्यालयमा भेला जम्मा भएका थिए ।

बस्नेत सोलुखुम्बु आउनु अघि जिल्लाको सेनानीको रुप कुलदिप कुवँर रहनुभएको थियो भने नयाँ मेजरको रुपमा को आउने टुङ्गो लागी नसकेको उहाँको भनाई छ ।  आफ्नो १० महिने सोलुखुम्बु बसाइ सुखद रहेको भन्दै सेनानी बस्नेतले आफ्नो गृहजिल्ला भएकाले आफ्नो ठाउँको सेवा गर्न पाउँदा भाग्यशाली महसुस गरेको बताउनुभएको छ ।