स्थानीय तहले जग्गा वर्गीकरण नगर्दा सोलुखुम्बुमा रोकियो जग्गाको कित्ताकाट

भदौ ६, सोलुखुम्बु । सोलुखुम्बुमा जग्गाको कित्ताकाट रोकिएको छ । स्थानीय तहले जग्गा वर्गीकरण नगर्दा जिल्ला भरका जग्गाको कित्ताकाट रोकिएको हो । जिल्लाका सोलुदुधकुण्ड नगरपालिका, नेचा सल्यान गाउँपालिका र थुलुङ दुधकोशी गाउँपालिकाले जग्गाको वर्गीकरण गरेको भएयता भु उपयोग नक्सा नबुझाएकाले कित्ताकाट रोकिएको नापी कार्यालय सोलुखुम्बुका प्रमुख प्रमोद गुरागाइले जानकारी दिनुभयो ।

उहाँका अनुसार खुम्बु पासाङल्हामु गाउँपालिका, दुधकोशी गाउँपालिका, सोताङ गाउँपालिका र महाकुलुङ गाउँपालिकाले जग्गा वर्गीकरण र भु उपयोग नक्सा नबुझाएकाले कित्ताकाट रोकिएको उहाँको भनाई छ । यो नियमावली २०८० साउन ३२ गते राजपत्रमा प्रकाशित भएको थियो ।

नियमावलीअनुसार २०८१ साउन ३२ गतेभित्र जग्गाको वर्गीकरण गरिसक्नुपर्ने थियो । नियमावलीमा भएको व्यवस्थाअनुसार जग्गाको वर्गीकरण नभएपछि कित्ताकाट हाललाई रोकिएको मालपोत कार्यालयले जनाएको छ । जग्गाको वर्गीकरण भइनसकेकाले सरकारले म्याद थपेको अवस्थामा मात्रै अब कित्ताकाट खुल्ने छ, वा स्थानीय तहले जग्गाको वर्गीकरण गर्नुपर्छ ।

कुन कित्ताको जग्गा कुन क्षेत्रमा पर्छ भनी वर्गीकरण गर्नुपर्ने व्यवस्था छ । यसअघि वडाको सिफारिसका आधारमा जग्गाको कित्ताकाट हुने गरेको थियो । अब स्थानीय तहले आफ्नो जग्गाको वर्गीकरण गरी त्यसको विवरण मालपोत र नापी कार्यालयमा पठाउनुपर्ने छ ।