फाप्लु बाट थुप्छेन छोलिङ जाने सडक स्तरोन्नति हुँदै, नगरपालिकाको टोलीले गर्यो फिल्ड भिजिट 

भदौ ७, सोलुखुम्बु । सोलुदुधकुण्ड नगरपालिकाले आफ्नो हाता भित्र रहेका सडक स्तरोन्नति गर्ने कार्यलाई तिव्रताका साथ अघि बढाउदै छ ।  नगरपालिकाले वडा नम्बर ४ फाप्लुबाट वडा नम्बर २ मा रहेको धार्मिक पर्यटकीय थुप्छेन छोलिङ गुम्बा जाने सडक स्तरोन्नति हुने भएको छ ।  सघन सहरी तथा भवन निर्माण आयोजना ओखलढुङ्गाको लागतमा सडक स्तरोन्नती हुने भएको हो ।

शुक्रबार नगरप्रमुख नाम्गेल जाङबु शेर्पा सहित प्रमुख प्रशासकीय अधिकृत कोपिला राई, वडा नम्बर ४ का वडा अध्यक्ष युवास तामाङ लगायत भवनका कर्मचारी सहितको टोलीले साइट भिजिट गरेर स्तरोन्नति गर्नुपर्ने स्थानहरूको अवलोकन गरेको छ ।  मौसममा सुधार हुँदै गएपछि  काम सुरु गरि चाँडै सक्ने गरि काम अघि बढ्ने मेयर शेर्पाले बताउनुभयो । 

सघन सहरी तथा भवन निर्माण आयोजना ओखलढुङ्गाको भ्याट सहित ८ करोड ५४ लाख ११ हजार १ सय ८७ रुपैयाँ बजेटमा ठेक्का सम्झौता भएको सडक कार्यालयका इन्जिनियर सुदीप दाहालले बताउनुभयो । उहाँका अनुसार उक्त बजेटमा सल्लेरी बजार आस पास सहित २ दशमलव ४६ किमि ढलान, १ हजार ३ सय घनमिटर ग्याविन वाल, ७ सय ७३ घनमिटर मेसिनरी वाल लगाइने जनाइएको छ ।

 यस्तै ड्रेन करिव १ हजार ७ सय मिटर हाराहारीमा निर्माण हुने दाहालले बताउनुभयो । नगरपालिका क्षेत्र भित्रको सडकलाई बाह्रै महिना चल्न सक्ने बनाउदै लैजाने बाटोमा नगरपालिका रहेको मेयर शेर्पाले बताउनुभयो ।