बाढी पीडितकालागी राहत रकम लिएर सोलुदुधकुण्ड नगरपालिका थामेमा 

भदौ ८, सोलुखुम्बु ।   हिमताल फुट्दा बाढीले क्षतिग्रस्त थामे गाउँका नागरिकको राहतका वितरणका लागी सोलुदुधकुण्ड नगरपालिका खुम्बु पुगेको छ ।  खुम्बु पासाङल्हामु गाउँपालिका वडा नम्बर ५ थामेका गत साउन ३२ गते आएको बाढीले विस्थापित बनाएका २० घर परिवारको लागी राहत रकम लिएर नगरपालिकाका प्रमुख तथा नेपाली काङ्ग्रेस साेलुखुम्बुका सभापति नाम्गेल जाङ्बु शेर्पाको टोली थामे गएको हो ।

टाेलीमा सभापती एवं नगरप्रमुख शेर्पाकाे नतृत्वमा  नगरका प्रमुख प्रशासकीय अधिकृत कोपिला राई, प्रहरी सहित विस्थापित परिवारका लागी २१ लाख रुपैयाँ राहत रकम वितरण गर्न खुम्बु पुगेको नगर प्रवक्ता फुर्वा ग्याल्जेन शेर्पाले बताउनुभयो । उहाँका अनुसार बाढीपीडितको राहत र पुनर्स्थापनाका लागी १० लाख नगरपालिकाको तर्फबाट, सभापति शेर्पाकाे पहलमा पाइलापाइला  फाउण्डेसनको तर्फबाट १० लाख र अन्य १ लाख गरि जम्मा २१ लाख राहत रकम लिएर नगरप्रमुख शेर्पा सहितको टोली थामे गएको हो ।

शनिवार बिहान फाप्लुबाट स्याङ्बोचे विमानस्थल सम्म हेलिकप्टरमा गएको राहत वितरण टोली त्यहाँबाट ३ घण्टाको पैदल यात्रा तय गरि थामे पुग्ने छ । प्रदेश सरकारले लिएर आएको राहत सामाग्री सहित गएको मेयर शेर्पाको टोलीले बाढी प्रभावित क्षेत्रको अवलोकन गरि पीडितहरूलाई राहत आजै वितरण गर्ने जनाइएको छ  ।