थामे पुनस्थापनाका लागि ६६ लाख बढी रकम जुट्यो

भदौ १५, सोलुखुम्बु । सोलुखुम्बुको खुम्बु पासाङल्हामु गाउँपालिका वडा नम्बर ५ थामेका बाढी प्रभावितका लागि ६६ लाख बढी रकम जुटेको छ । बाढी प्रभावित क्षेत्रमा पुनस्थापना र पुननिर्माणका लागी ६६ लाख ३५ हजार ४ सय ५५ रुपैयाँ बाढी प्रभावितका लागि रकम जुटेको हो ।

खुम्बु पासाङल्हामु गाउँपालिकाका प्रवक्ता लाक्पा छिरी शेर्पाा अनुुसार गाउँपालिकाको खातामा काठमाडौँ महानगरपालिकाले २० लाख रुपैयाँ जम्मा गरेको छ । यस्तै हिमालयन ट्रस्ट नेपालबाट ३५ लाख रुपैयाँ पासाङल्हामु फाउण्डेसनबाट ५ लाख, रोटरी क्लब काठमाण्डौबाट २ लाख ७५ हजार रुपैयाँ जम्मा भएको खुम्बु पासाङल्हामु गाउँपालिकाले जनाएको छ ।

यस्तै पाङबोचे बासीबाट ३ लाख ४४ हजार ३ सय ५५ रुपैयाँ र नाम नखुलेकोबाट ८ हजार रुपैयाँ जम्मा भएको छ । बाढी प्रभावित क्षेत्रमा पुनस्थापना र पुननिर्माणका लागी सहयोग रकम सङ्कलन भइरहेको गाउँपालिका प्रवक्ता लाक्पा छिरी शेर्पाले जानकारी दिनुभयो।

गत साउन ३२ गते थामेमा हिमपहिरो विस्फोट हुँदा गेग्रान र ढुंगा सहित आएको बाढीले एउटा विद्यालय, एउटा स्वास्थ्य चौकी, २ वटा होटल, १३ वटा घर पूर्ण र १० वटा घर आंशिक रूपमा क्षति भएको थियो । ९५० किलोवाट क्षमताको जलविद्युत् परियोजनामा समेत क्षति पुगेको थियो । विपदको समयमा बाढीबाट विस्थापित भएका पिडितहरुलाई राहत उपलब्ध गराएका प्रति खुम्बु पासाङल्हामु गाउँपालिकाले आभार समेत प्रकट गरेको छ ।