खिजीदेम्बाका ४६ सगरमाथा आरोही सम्मानित, खिजीदेम्बामा पर्यटकीय हब बनाईने

 भदाै १६, साेलुखुम्बु ।  ओखलढुङ्गाको खिजीदेम्बा गाउँपालिकाले सगरमाथा आरोहण गर्ने ४६ जना आरोहीलाई सम्मान गरेको छ । पालिका भित्रका सगरमाथा चढ्ने अरोहिहरुलाई राजधानी काठमाण्डौमा कार्यक्रमको आयोजना गरि पर्यटन मन्त्री मार्फत सम्मान पत्र हस्तान्तरण गरिएको हो । पालिका अध्यक्ष गम्बु शेर्पाको अध्यक्षतामा भएको कार्यक्रममा संस्कृति पर्यटन तथा नागरिक उड्यन मन्त्री बद्रिप्रसाद पाण्डेले सम्मान पत्र हस्तान्तरण गर्नु भएको हो ।

यस्तै आजै गाउँपालिकाले पर्यटन सद्भावना दूत समेत घोषणा गरेको छ । गाउँपालिकाको लोगो सगरमाथा सम्म पु¥याउन सफल आरोही कुङ्गा शेर्पालाई गाउँपालिकाले पर्यटन सद्भावना दूत घोषणा गरेको हो ।  स्थानीय सरकारले सम्मानित गरेपछि आरोहीहरूले खुसी व्यक्त गरेका छन् । 

कार्यक्रममा पर्यटन मन्त्री पाण्डेले खिजीदेम्बाको खिजी चण्डेश्वरी विमानस्थल सुचारु गर्न अग्रसरता लिने बताउनु भयो । वहाँले नेपालमा रहेका पर्यटकीय सम्पदा र संस्कृतिको संरक्षण र प्रवर्द्धनमा सरकार गम्भिर रुपमा लागेको बताउनु भयो । भ्रष्टाचार नियन्त्रण र अर्थतन्त्र चलायमान बनाउन काँग्रेस एमालेको सरकार बनेको बताउनु भयो ।

सम्मान कार्यक्रममा संसद्को राज्यव्यवस्था समितिका सभापति रामहरी खतिवडाले खिजीदेम्बा गाउँपालिकाले तिनै तहका सरकारलाई विकासमा खबरदारी गर्ने कार्यक्रमको थालनी गरेकोमा प्रशंसा गर्नु भयो । खिजीदेम्बामा जिल्लाकै पर्यटकीय गाउँपालिकाको रुपमा विकशित गर्न आफु लागि पर्ने खतिवडाको भर्नाइ छ । 

संविधानसभा सदस्य यज्ञराज सुनुवारले शेर्पा समुदायले हिमाल चढेर नेपाललाई चिनाएको भन्दै ओखलढुङ्गाकै पहिलो पर्यटकीय पालिका खिजीदेम्बा नै रहेको धारणा राख्नु भयो । वहाँ यहाँको विमानस्थल सञ्चालनमा सबै जिम्मेवार हुनु पर्ने धारणा राख्नु भयो । 

प्रदेश सभाका सांसद तथा पूर्व स्वास्थ्य मन्त्री प्रदिप सुनुवारले खिजीको विमानस्थल सुचारु गरि पर्वतीय उडानहरू राख्नु पर्नेमा जोड दिनु भयो । वहाँ आरोहीलाई सम्मान गरेर स्थानीय सरकारले राम्रो परम्पराको जग बसाएको विचार व्यक्त गर्नु भयो । 

नेपाल पर्वतारोहण सङ्घका अध्यक्ष निमा नुरु शेर्पाले सरकारले हिमालहरू खोसेर र रोयल्टी अड्काएर पर्वतारोहण सङ्घलाई निकम्मा बनाउन खोजेको आरोप लगाउनु भयो । 

कार्यक्रममा बोल्दै गाउँपालिका अध्यक्ष गम्बु शेर्पाले आरोहीहरुलाई सम्मानित गर्न पाउँदा गाउँपालिकाकै सम्मानित महशुस भएको बताउनु भयो । राज्यको अर्थतन्त्रको दोश्रो हिस्सा पर्यटनले धानेको भन्दै राज्यले यसको विकासमा ध्यान दिन आवश्यक रहेको बताउनु भयो । वहाँले आफ्नो कार्यकालमा पालिकालाई पर्यटकीय रुपमा विकसित गर्न चाहेकोले सबै तहको सरकारलाई साथ दिन आग्रह गर्नुभयो । 

कार्यक्रममा गाउँपालिकाका निवर्तमान अध्यक्ष वेद बहादुर रोक्का, गाउँपालिका उपाध्यक्ष शुसिला तामाङ, वडा अध्यक्षहरु लगायतको उपस्थिति रहेको थियो ।