भदौ २५, सोलुखुम्बु । रीड नेपालको आयोजना, सोलुदुधकुण्ड नगरपालिकाको समन्वय तथा अस्ट्रेलियन एड र अष्ट्रेलियन हिमालयन फाउन्डेसनको आर्थिक सहयोगमा लैङ्गिक संवेदनशील अपांगता मैत्री सुरक्षित वातावरण निर्माण तथा समावेशी शिक्षा सम्बन्धी २ दिने तालिम सुरू भएको छ । सोलुदुधकुण्ड नगरपालिकाका रीड नेपालले काम गरिरहेको १९ विद्यालयका प्रअहरु, स्थानीय स्रोत शिक्षक र जेन्डर फोकल शिक्षक गरी जम्मा ३८ जनाको सहभागितामा तालिम सञ्चालन भइरहेको हो ।
कार्यक्रम रीड नेपालका शिक्षा विकास संयोजक केशव देव गिरीको अध्यक्षता तथा सोलुदुधकुण्ड नगरपालिकाका मेयर नाम्गेल जाङ्बु शेर्पाको प्रमुख आतिथ्यतामा उद्घाटन गरिएको हो । कार्यक्रमको उद्घाटन गर्दै मेयर शेर्पाले विद्यालयको गुणस्तर सुधार गर्नका निम्ति लैङ्गिक संवेदनशील अपांगता मैत्री सुरक्षित वातावरण निर्माण तथा समावेशी शिक्षा अतिआवश्यक रहेको बताउनु भयो । अहिलेको समयमा शिक्षाको प्रतिस्पर्धा विश्वका विद्यार्थीहरूसँग भएकोले बितावी ज्ञानमात्र सिकाएर नपुग्ने भन्दै अन्य विषयलाई पनि समेट्नुपर्ने बताउनु भयो । यस्तै निजी विद्यालयका विद्यार्थी भन्दा सामुदायिक विद्यालयका विद्यार्थीहरु बढी प्रतिभाशाली र व्यवहारिक हुने गरेको जिकिर गर्नुभयो ।
रीड नेपालले लामो समय देखि सोलुखुम्बुमा महत्त्वपूर्ण योगदान गरेको भन्दै अहिलेको आवश्यकता अनुसारका तालिम सञ्चालन गरेकोमा धन्यवाद ज्ञापन गर्नु भयो । यस्तै कार्यक्रममा बोल्दै नगरपालिकाकी उपमेयर गान्धीमाया तामाङले अत्यन्त महत्त्वपूर्ण विषयमा तालिम सुरू भएको भन्दै सिकेको कुरा विद्यालयमा लागू गर्न आग्रह गर्नु भयो ।
शिक्षा विकास तथा समन्वय इकाई प्रमुख पुण्यप्रसाद डङ्गोलले कार्यक्रम सफलताको शुभकामना दिनु भयो । कार्यक्रममा बोल्दै रीड नेपालका संयोजक एवं कार्यक्रमका अध्यक्ष केशव देव गिरीले विद्यालयको गुणस्तर सुधार गर्न सिकाइ उपलब्धीका साथै अन्य कुराहरुलाई पनि संगसंगै लैजानु पर्ने बताउँदै लैङ्गिक मैत्री, अपाङ्गता मैत्री, बालमैत्री विद्यालय निर्माण आजको आवश्यकता भएकोले यसका लागी मुख्य जिम्मेवार प्रधानाध्यापक को हुने हुँदा यो तालिम मा प्र अ हरुलाई पनि समेटेर तालिमको आयोजना गरेको बताउनु भयो । कार्यक्रमको सहजीकरण कमला उप्रेतीले गरिरहनु भएको छ ।
Discussion about this post