मावि स्तरीय छात्रा भलिबल प्रतियोगिताको प्रथम उपाधि जित्यो शुक्रजित माविले

सोलुखुम्बु, बैशाख २० । बैशाख मावि स्तरीय छात्रा भलिबल प्रतियोगिताको प्रथम उपाधी शुक्रजित माविले जितेको छ । जी फाउण्डेशनको आर्थिक तथा प्राविधिक सहयोग, केपिलासगढी गाउँपालिकाको समन्वय तथा सिर्जनशील भरिया समाजको आयोजनामा सम्पन्न प्रतियोगिताको प्रथम उपाधि उक्त माविले जालपा माविलाई पछाडी पार्दै प्रथम स्थान हासिल गरेको हो । प्रतियोगिताको दोश्रो स्थान जालपा माध्यमिक विद्यालय केपिलासगढी ४ पिपलडाँडा र तृतीय स्थान राष्ट्रिय माध्यमिक विद्यालय केपिलासगढी ३ बास्पानी हासिल गरेको आयोजक सिर्जनशील भरिया समाजका अध्यक्ष निरञ्जना राईले जानकारी दिनुभयो ।

वैशाख १९ र २० गते सम्पन्न उक्त प्रतियोगितामा केपिलासगढी भित्रको कुहू डाँडा मावि वडा १ फेदी, पृथ्वी मावि वडा नं ४ बाक्सिला, थर्पुडाँँडा मावि वडा नम्बर ५ सप्तेश्वर, सूर्य मावि दिप्सुङ सहित ७ ओटा विद्यालय बीचको प्रतिस्पर्धा रहेको थियो । प्रतियोगितमा उत्कृष्ट खेलाडी शुक्रजित माविकी खेलाडी दिपिशा राई ले जितेकी छन् । उत्कृष्ट डिफेन्सिभ राष्ट्रिय माविकी दिर्पना राई, उत्कृष्ट लिफ्टर जालपा माविकी भावना अधिकारी, उत्कृष्ट ब्लकर शुक्रजित माविकी आइसा राई उत्कृष्ट स्पाइकर जालपा मावि अस्मिता खत्री हुन सफल भएको सिर्जनशील भरिया समाजको अध्यक्ष राईले जानकारी दिनुभयो ।

कार्यक्रमका क्रममा केपिलासगढी गाउँपालिकाको अध्यक्ष समिर राईले जी फाउण्डेशनको आर्थिक तथा प्राविधिक सहयोगमा सिर्जनशील भरिया समाजको यस पालिकाको शैक्षिक, कृषि, विद्यालयको भौतिक संरचना तथा सामाजिक विकासमा महत्वपूर्ण भूमिका निर्वाह गर्दै आएको बताउनुभयो । स्थानीय सरकारको जिम्मेवारी भित्र रहेका यस्ता विकासका क्रियाकलापहरूमा थप सकारात्मक परिर्वतन गराउन उल्लेखनीय भूमिका निभाउन सफल भएकोमा आभार व्यक्त गर्नुभयो ।

साथै खेलकुदको क्षेत्रमा प्रायः जसो प्रतिस्पर्धा पुरुष खेलाडीबीच मा हुने गरेकोमा अहिले महिलाबीचको प्रतिस्पर्धा र उनीहरुको प्रस्तुतिले महिलाहरु पनि पुरुष भन्दा कम छैनन् भन्ने सन्देश पर्बाह ट भएको उहाँले बताउनुभयो । प्रतियोगिता समापनमा बोल्दै वडा नम्बर ४ का वडा अध्यक्ष खड्ग बहादुर तामाङले पालिकाले खेलकुदको क्षेत्रमा बजेट विनियोजन गरेको भएता पनि महिलाहरुलाई कमै प्राथमिकता दिने गरेको तर संस्थाले विशुद्ध रुपमा महिलाहरुलाई प्राथमिकता दिई खेलकुदको क्षेत्रमा महिलाहरुको पनि नेतृत्व क्षमताको विकास गराउन सघाउ पुगेकोमा आभार व्यक्त गर्नु भयो ।