खोटाङमा निःशुल्क आँखा शल्यक्रिया शिविर हुँदै

बैशाख २०, सोलुखुम्बु । नेपाल नेत्र ज्योति संघ खोटाङले बैशाख २९ गते देखी ३१ गते सम्म तिन दिन निःशुल्क आखा शल्यक्रिया शिविर सञ्चालन गर्ने भएको छ । आँखा स्वास्थ्यको क्षेत्रमा महत्वपुर्ण काम गर्दै आएको नेत्र ज्योति संघ खोटाङले जिल्लाको दिक्तेल रुपाकोट मझुवागढी नगरपालिकाका १५ वटै वडाबाट छनौट गरिएका विरामीहरुको लागी शल्यक्रिया शिविर सञ्चालन गर्ने भएको हो । करुणा फाउण्डेसन नेपाल, दिक्तेल रुपाकोट मझुवागढी नगरपालिका र नेत्र ज्योति संघ खोटाङको संयुक्त साझेदारीमा आँखाका विरामीहरूका लागी विभिन्न सेवा प्रदान गरिने नेत्र ज्योति संघ खोटाङका सभापति इन्द्र कसजुले बताउनुभयो ।

उहाँले  निःशुल्क आँखा शल्यक्रिया शिविरमा आँखा जाँच तथा औषधि वितरण, माेतिविन्दुकाे परिक्षण तथा शल्यक्रिया, ज्येष्ठ नागरिकलाई दृष्टि चस्मा वितरण, न्युन दृष्टि भएका बालबच्चा र फरक क्षमता भएकाहरुलाई आवश्यक्ता अनुसारको सेवा प्रदान गरिने जनाउनुभयो । शिविरका लागी आँखा अस्पताल लाहानले प्राविधिक सहयोग गर्ने जनाइएको छ ।

शिविरमा १ हजार २ सय १८ जना विरामीहरुको आँखा जाँच गरिने लक्ष रहेको नेत्र ज्योति संघले जनाएको छ । यस्तै ७ सय ६० जना विरामीलाई औषधि वितरण, १ सय २० जना विरामीको मोतिविन्दुको शल्यक्रिया र चस्मा वितरण, ७ सय ५० ज्येष्ठ नागरिकलाई दृष्टि चस्मा वितरण, ५० बालबालिका र ५० फरक क्षमता भएकाहरुलाई आवश्यक्ता बमोजिमको सेवा प्रदान गरिने सभापति कसजुले जनाउनुभयो । यो शिविर नेत्र ज्योती संघको दिक्तेल स्थित उपचार केन्द्रबाट सञ्चालन हुने जनाइएको छ । हाल सम्म नगरपालिकाका ८ ओटा वडामा छनौट शिविर सम्पन्न भइसकेको छ बाँकी ७ वटा वडामा शिविर सुरु हुने दिन सम्म छनौट सम्पन्न गरिने सभापति कसजुले बताउनुभयो ।