भदौ २७, सोलुखुम्बु । साेलुखुम्बुकाे थुलुङ दुधकोशी गाउँपालिकामा २ दिने लैङ्गिक संवेदनशील, अपाङ्गता मैत्री सुरक्षित विद्यालय निर्माण तथा समावेशी शिक्षा सम्बन्धी तालिम सुरु भएको छ । रीड नेपालको आयोजना तथा थुलुङ दुधकोशी गाउँपालिकाको समन्वयमा आयोजित उक्त तालिमको गाउँपालिका प्रमुख असिम राईले विहीबार उद्घाटन गर्नुभयो ।
रीड नेपालका शिक्षा विकास संयोजक केशवदेव गिरीको अध्यक्षतामा भएको उद्घाटन कार्यक्रममा प्रमुख अतिथि गाउँपालिका अध्यक्ष असिम राईले समाज परिवर्तनको सम्भाहक शिक्षा क्षेत्र रहेकोले आफ्नो प्रमुख लक्ष्य नै शिक्षामा परिवर्तन गर्नु रहेको बताउनु भयो ।
विद्यालयको सकारात्मक सुधार गर्नका लागी मुख्य जिम्मेवारी सम्बन्धित विद्यालयको प्रधानाध्यापकको भएकोले प्रधानाध्यापकलाई जिम्मेवार ढङ्गले आगाडि बढ्न उहाँले निर्देशन दिनुभएको छ । उहाँले विद्यालयमा विद्यार्थीहरूका गुनो सुन्न गाउँपालिकाले अनलाइन रिपोर्टिङ मेकानिजम समेत निर्माण गरिरहेको जानकारी दिदैँ लैङ्गिक, अपाङ्गता, सुरक्षित विद्यालय निर्माण र बाल सुरक्षाको क्षेत्रमा संवेदनशील र जिम्मेवारी पूर्वक काम गर्न आग्रह गर्नुभयो ।
यस्तै कार्यक्रममा गाउँपालिकाका प्रमुख प्रशासकीय अधिकृत प्रसन्नदीप राई तथा शिक्षा शाखा प्रमुख गणेश गुर्धामीले कार्यक्रम आयोजनाको लागि रीड नेपाललाई धन्यवाद दिदै कार्यक्रम सफलताको शुभकामना व्यक्त गर्नुभयो ।
कार्यक्रमको उद्देश्य माथि प्रकाश पार्दै रिड नेपालका संयोजक केशव देव गिरीले शैक्षिक गुणस्तर सुधार गर्न बालबालिकाले विद्यालयको वातावरणमा रमाएर समानरूपमा सिक्ने वातावरण सिर्जना हुनु पर्ने बताउँदै सिकाइ उपलब्धि सँगै लैङ्गिक मैत्री , बाल मैत्री, अपाङ्गता मैत्री र समावेशी शिक्षाले मात्र विद्यालयलाई नमुनाको रुपमा अगाडि बढाउन सक्ने हुँदा यी विषयवस्तु तालिममा समेटेको बताउनुभयो ।
उक्त तालिममा पालिका भित्रका १५ विद्यालयका प्रधानाध्यापक, जेन्डर फोकल शिक्षक र स्थानीय स्रोत शिक्षकहरूको उपस्थिति रहेको छ । तालिमको सहजीकरण रिड नेपालका कार्यक्रम संयोजक गिरी र रीड नेपालका शिक्षा विकास अधिकृत अभिषेक विक्रम शाहले गरिरहनु भएको छ ।
Discussion about this post