चाड पर्व लक्षित सडक दुर्घटना न्युनिकरणका लागी पहल गर्ने जिल्ला विपद व्यवस्थापन समिति सोलुखुम्बुको निर्णय

भदाै २७, साेलुखुम्बु ।   जिल्ला विपद व्यवस्थापन समिति सोलुखुम्बुको नियमित बैठक बसेको छ । प्रमुख जिल्ला अधिकारी एवं जिल्ला विपद व्यवस्थापन समितिका संयोजक देवी पाण्डे खत्रीको अध्यक्षतामा समितिको नियमित बैठक बसेको हो । गत साउन ३२ गते गएको थामे हिमपहिरोबाट प्रभावितहरूका लागी राहत र पुनर्स्थापनामा गरिएको पहलकदमी र सहयोगको जानकारी सहित अन्य विविध विषयमा बैठकमा छलफल भएको छ ।

यस्तै बैठकमा नजिकिँदै गरेको चाडपर्व लक्षित सडक सुरक्षालाई चुस्त दुरुस्त राख्ने विषमा पनि छलफल भएको छ । बैठकले दशैँ तिहार जस्ता चाडपर्वमा हुन सक्ने सम्भावित दुर्घटना न्यूनिकरणका लागी सडक मर्मत गर्ने, ट्राफिक सङ्केत राख्ने, बाटोको दूरी र दिशा देखाउने सङ्केत राख्ने लगायतका विषयमा छलफल गरि उक्त कार्यका लागी स्थानीय तह, सडक डिभिजन कार्यालयलाई पत्राचार गर्ने निर्णय भएको जिल्ला प्रशासन कार्यालयका सहायक प्रमुख जिल्ला अधिकारी तथा सूचना अधिकारी रूपेश विश्वकर्माले जानकारी दिनुभयो । बैठकमा जिल्ला प्रहरी कार्यालय सोलुखुम्बुका प्रहरी प्रमुख नायब उपरीक्षक द्वारीका प्रसाद घिमिरेले थामे बाढी पछिको त्यहाँको अवस्था र प्रहरीले गरेको कामको बारेमा प्रस्तुतिकरण पेश गर्नुभएको थियो ।

बैठकमा चाडपर्व लक्षित बजार अनुगमनका विषयमा पनि छलफल भएको छ । उक्त विषयको छलफलमा जिल्ला स्थित स्थानीय सरकारलाई बजार अनुगमनको अधिकार भएकाले स्थानीय सरकारले सम्बन्धित बजार अनुगमन गर्न सक्ने प्रमुख जिल्ला अधिकारी पाण्डेले बताउनुभएको छ । यस्तै बैठकमा विपदको समयमा अहोरात्र खट्ने नेपाल प्रहरी, सशस्त्र प्रहरी, नेपाली सेना लगायत स्थानीय सरकार, सङ्घसंस्थालाई धन्यबाद ज्ञापन गरिएको छ ।

बैठकमा नेपाल प्रहरी सोलुखुम्बुका प्रनाउ द्वारीका प्रसाद घिमिरे, शसस्त्र प्रहरी वल सोलुखुम्बुका प्रमुख डीएसपी गोविन्द पोखरेल, महाकुलुङ गाउँपालिकाका अध्यक्ष सूर्य बहादुर कुलुङ, नेचासल्यान गाउँपालिकाकाका उपाध्यक्ष विना राई, थुलुङ दुधकोशी गाउँपालिकाका प्रवक्ता भोजराज कार्की, उद्योग वाणिज्य सङ्घ सोलुखुम्बुका अध्यक्ष रामलाल श्रेष्ठ लगायत जिल्ला विपद व्यवस्थापन समितिका पदाधिकारी एवं सदस्यहरूको उपस्थिति रहेको थियो ।