सिन्धुलीमा स्वास्थ्य शिविरको पहिलो दिन ७ सय बढीले सेवा लिए

भदौ २९, सोलुखुम्बु । सिन्धुलीको गोलञ्जोर गाउँपालिकामा सञ्चालित निःशुल्क स्वास्थ्य शिविरमा ७ सय बढीले सेवा लिएका छन् । काठमाडौंको निजामती कर्मचारी अस्पताल र गोलञ्जोर गाउँपालिकाले स्वास्थ्य तथा जनसंख्या मन्त्रालयको समन्वयमा निःशुल्क स्वास्थ्य शिविरबाट ७ सय ३० जनाले सेवा लिएका हुन् ।

शिविरको पहिलो दिन शुक्रबार ४३२ जना महिला र २९८ जना पुरुष रहेका छन् । शिविरमा स्वास्थ्य जाँच गराउनेहरुलाई एक्सरे परीक्षण, ल्याब, इसिजी, युएसजीलगायत परीक्षण, सर्जरी ओपिडी, माइनर ओटी, गाइनो ओपिडी, डेण्टल ओपिडी, अर्थो ओपिडी, आँखा, मेडिसिनलगायत विभिन्न परीक्षण सेवा प्रदान गरिएको जनाइएको छ ।

विभिन्न रोगका विशेषज्ञ चिकित्सकहरुले सहभागीहरुको स्वास्थ्य जाँचका साथै आवश्यक परामर्श प्रदान गरिएको गाउँपालिकाले जनाएको छ । गोलञ्जोर–३ ग्वाल्टारस्थित कोशिका माविमा सञ्चालित स्वास्थ्य शिविर शनिबारसम्म सञ्चालन गरिएको छ ।

निःशुल्क स्वास्थ्य शिविरमा स्वास्थ्य जाँच गराई लाभ लिन गाउँपालिकाले आह्वान समेत गरेको थियो । शिविरमा गोलञ्जोर गाउँपालिकावासीले मात्रै नभई वरपरका अन्य पालिकाका बासिन्दाले पनि सेवा लिएको जनाइएको छ ।